Claramatte
| Dialäkt: Baseldütsch |
Koordinate: 47° 33′ 49″ N, 7° 35′ 41″ O; CH1903: 611748 / 268112
D Claramatte isch e Park im Clara-Quardier in dr Schwizer Stadt Basel.
Gschicht ändere
Dr Name Claramatte, e Matte am «Chrumme Dyych», isch scho us em 15. Johrhundert bekannt. Vo 1820 aa isch dört e Durn- und Badblatz für Waisemaitli gsi. in de 1850er Johr het mä afo Blän für d Matte mache und 1864 isch die rächteggigi Parkaalag aagleit worde, wo in dr Middi e Matte und zringsum zwei Baumreihe gha het. An dr Klingedaalstrooss, an dr Droohtzugstrooss und am Claramattwäg het mä Bauparzälle blant. Uf d Schlittschuehbahn het mä müesse verzichde, wo Wasser in d Chäller näbedra gsickeret isch, und wo dr Rase im Park immer vo de Lüt verdramplet worden isch, het mä s Gländ ufgschüttet und dr Stadtgärtner Weckerle het dr Park in de 1870er Johr neu gstaltet noch em Vorbild vom änglische Square: e viereggigi Grüenflechi mit Zuegäng an de Egge, wo symmetrisch beflanzt worden isch.
1897 isch es stedtischs Bad baut worde, e Geissemilchbude und e Wärkzüüghütte, drei Johr spöter en öffentligs Pissoir hinder em Brunne an dr Hammerstrooss. S Bad isch in de Johr druf usbaut worde, und denn het mä e Musigpavillon baut. In de 1930er isch d Aalag wider umbaut worde: es het meh Raseflechene gee, e Chinderspiilblatz mit eme Sandhufe und eme Blanschbecki isch iigrichdet worde und an dr Klingedaal- und dr Droohtzugstrooss het s Autoparkblätz gee. 1937 het dr Karl Guetchnächt si «Schlangebrunne» ufgstellt, wo dr alt Drinkwasserbrunne us em Johr 1873 ersetzt het.
In de 1940er Johr het mä e Deil vo de Bäum abgholzt, für dass es meh Sunne uf dr Matte wurd gee, und d Badaastalt Claramatte isch zum e Chindergarte umbaut worde. Im Johrzähnt druff het mä d Aalag schmeler gmacht und neuji Parkblätz iigrichdet. D Geissemilchbude isch abbroche und no meh Bäum si gfellt worde. 1958 isch en öffentligi Toilette am Egge vo dr Hammerstrooss und dr Droohtzugstrooss baut worde. In de Johrzähnt druf het mä chliineri Ändrige gmacht, neuji Spiilgrät si ufgstellt und e WC für Hünd isch iigrichdet worde.
Im Johr 2000 het d Christoph Merian Stifdig e Renovation vo dr Claramatte afo blaane. Mä het beschlosse, ass die ursprüngligi Idee vom Square die besti siig und ass d Parkblätz in es underirdischs Parkhuus under dr Klingedaalstrooss sötte verleit wärde. Dr Verein Claramatte het afo Spiilnoomiddäg organisiere, s Baudepartemänt het 2002 dr Musigpavillion gflickt und 2003 het dr Bau vom Parkhuus aagfange.
Prostitution und Drooge ändere
D Claramatte mit dr Klingedaal- und dr Drohtzugstrooss isch lang e Zentrum vo dr stedtische Prostitution gsi. Wo in de 1970er Johr Massagesalon iigrichdet worde si, isch e groosse Deil vo dr Prostitution us em öffentlige Ruum verschwunde. Hützudags findet mä uf dr Claramatte ehnder Drogeabhängigi, wo d Prostitution für se e Wäg isch, ihri Droge z finanziere, as professionelli Huehre.