D Dreiroosebrugg
Koordinate: 47° 34′ 15″ N, 7° 35′ 5″ O; CH1903: 610994 / 268913
| Dreiroosebrugg | ||
|---|---|---|
 | ||
| Offizielle Naame | Dreiroosebrugg | |
| Brucht as | Stroossebrugg | |
| Überfüerig über | A3 | |
| Goot über | Rhii | |
| Ort | Basel | |
| Konstrukzioon | 1. Brugg: Vollwand-Balkebrugg 2. Brugg: Dobbelstockbrugg
| |
| Gsamtlengi | 226 Meter | |
| Bräiti | 1. Brugg: 18 m 2.Brugg: 2 mol 14,90m
| |
| Aafang vom Baue | 1. Brugg: 1931 2.Brugg: 1999
| |
| Fertig worde | 1. Brugg: 1934 2. Brugg: 2004
| |
| Eröffnig | 1. Brugg: 1.9.1934 2.Brugg: 8.11.2004
| |
| Blaaner | 1. Brugg: Maschinenfabrik Augsburg-Nürnberg AG und Grün & Bilfinger 2. Brugg: Steib+Steib
| |
| Lage | ||
| ||
| Dialäkt: Baseldütsch |
D Dreiroosebrugg isch e Stroossebrugg in dr Schwizer Stadt Basel und isch flussab die letschti Schwizer Rhiibrugg. D Brugg het iire Naame vo dr Liigeschaft „Zu de drei Roose“ am Chläibasler Bruggechopf überchoo.
Vorgschicht
ändereScho d Blään für d Erwiterig vo dr Stadt vom Joor 1897 häi bachab vo dr Johanniterbrugg non e Übergang über e Rhii vorgsee. In dr Zit vo 1907–1910 isch von ere Baanbrugg d Reed gsi, wo dr blaant Rhiihaafe Chläihünige mit em Santihannsbaanhoof hät sötte verbinde. 1918 het dr Bundesroot beschlosse, ass d Subwenzioon für dr Bau vom Rhiihaafe vom Bau vo dr Dreiroosebrugg as e kombinierti Iisebaan- und Stroossebrugg abhängig sig.
So isch e Brojekt entstande von ere Brugg, wo uf zwäi Pfiiler ufbaut isch, mit ere Bräiti vo 20 Meter, wo 4 Meter drvoo s Baangläis reserviert isch. Wil die finanzielli Laag vo dr Stadt grad noch em Erste Wältchrieg schwiirig gsi isch und es dringligeri Ufgoobe gee het, het mä dr Bau vo dr Brugg ufgschoobe. D SBB und die Dütschi Riichsbaan si sich äinig worde, ass mä vorlöifig dr Haafevercher dur e Baadisch Baanhoof wurd abwiggle, so dass d SBB uf e Baanlinie über d Dreiroosebrugg het chönne verzichte.
Die ersti Brugg
ändereD Lüt in de Kwardier Santihanns, Horburg und Chläihüünige häi aber immer no e Brugg welle und am 25. Juni 1925 het en Akzioonsusschuss en Iniziative mit 7.444 Underschrifte iigräicht, und dr Grooss Root het sä churz druf für erheeblig erkläärt. Mä het en internationale Wettbewärb usgschriibe und het im Joor 1930 76 Entwürf überchoo. Dr erst Briis isch an d Maschinenfabrik Augsburg-Nürnberg AG (MAN AG) us Gustavsburg und Grün & Bilfinger us Mannheim gange für iiri Vollwand-Balkebrugg uf zwäi Pfiiler. Am 11. Juli 1931 het s Volk ändlig dr Baukredit chönne absäägne und im Oktober 1931 het mä mit em Baue aagfange. Am 1. Septämber 1934 isch d Brugg iigweit worde.
D Brugg het us ere Staalbalkekonstrukzioon mit ere Lengi vo 225 Meter bestande, isch uf zwäi Stützpfiiler ufbaut gsi und het drei Öffnigen ghaa mit Stützwitene vo 75 Meter, 105 Meter und 75 Meter. D Gsamtbräiti vo dr Brugg isch 18 Meter gsi, 12 Meter drvo uf d Faarbaan mit zwäi Gläis für s Dram und uf baide Site e Drottwar, wo jedes 3 Meter brüit gsi isch.
Die zwäiti Brugg
ändere1960 het dr Bundesroot im Raame vom Schwizerische Nazionalstroossegsetz beschlosse, ass Basel sich drum müesse kümmere, ass es en Autibaanverbindig zwüsche dr Schwiz, Dütschland und Frankriich wurd gee. Die Stadtautibaan isch seer umstritte gsi und iiri Gegner häi mit zwäi Volksiniziative brobiert, iire Bau z verhindere. D Verbindig Schwiz–Dütschland isch um 1974(?) eröffnet worde und am 1. Septämber 1994 het mä aagfange d Nordtangänte A3 z baue, wo d Schwizer A2 mit dr franzöösische Autibaan A35 verbindet und sit em 16. Juni 2007 vollständig eröffnet isch.
Die alt Dreiroosebrugg isch z chlii gsi für dr Autibaanvercheer und mä het sä müesse ersetze. Mä het beschlosse e dobbelstöckigi Zwillingsbrugg z baue. Uf dr undere Ebeni isch d Autibaan duuregange und zum Schutz vor em Lärme hätt si uf bäide Site sötte verglaast si. Mä het denn aber 2007 beschlosse, d Verglaasig nume uf dr Stadtsite z mache. Die ooberi Ebeni isch für e Lokalvercheer reserviert gsi (Auti, Velo, ÖPNV) und für d Fuessgänger. Die bäide Faarspuure vom Dram si uf dr ganze Brugg vom Individualvercheer drennt gsi.
D Blään für die nöiji Dreiroosebrugg het s Basler Archidekturbüro Steib+Steib gmacht und si isch in Etappe baut worde. Zerst het mä vo 1999 aa die nördligi Helfti vo dr Brugg flussab näbe dr alte erste Brugg baut und dä Däil am 5. Novämber 2001 eröffnet. Denn isch die alti Brugg abbroche worde und mä het an diirem Blatz die zwäiti Helfti vo dr nöije Brugg baut. Die ganzi nöiji Brugg isch am 8. Novämber 2004 iigweit worde.
D Dreiroosebrugg isch e Staalverbund-Fachwärkbrugg. Äigentlig si s zwäi Brugge nääbenenader. D Brugg isch 226 Meter lang, het drei Öffnige mit 77 Meter, 105 Meter und 84 Meter Spannwiti und stoot uf zwäi Pfiiler. D Pfiiler vo dr alte Brugg si Däil vo de nöije Pfiiler. Jeedi vo de bäide Brugge isch 14,90 Meter bräit. Uf dr südlige Site isch e Bulwar für d Fuessgänger, wo öbbe 10 Meter bräit isch. D Drämligläis und d Faarbaane si uf dr nördlige Site vo dr Brugg.
Weblingg
ändere- Dreirosenbrücke. In: Structurae.
- Photos: Bilder-Datenbank des Kantons Basel-Stadt
- «Geschichte der Dreirosenbrücke» uf altbasel.ch
Commons: Dreirosenbrücke – Sammlig vo Multimediadateie
| Di nögscht Brugg flussufwärts: Johanniterbrugg |
Bruggene öber de Rhy | Di nögscht Brugg flussabwärts: Dreiländerbrugg |