D Joggelibrugg
Koordinate: 47° 32′ 24″ N, 7° 37′ 20″ O; CH1903: 613829 / 265491
| Joggelibrugg | ||
|---|---|---|
 | ||
| Offizielle Naame | St. Jakobsbrücke | |
| Brucht as | Stroossebrugg | |
| Überfüerig über | Birs | |
| Ort | Basel - Muttez | |
| Lage | ||
| ||
| Dialäkt: Baaseldütsch |
D Joggelibrugg (offiziell St. Jakobsbrücke) isch e Stroossebrugg über d Birs, wo d Stadt Baasel und iire Vorort Muttez verbindet. D Brugg lit zimlig dief, so dass es cha bassiere, ass bi Hoochwasser wie im August 2007 d Brugg muess gspert wärde für e Vercheer.[1] Vo 1921 bis 1951 isch au d Dramlinie uf Muttez über d Brugg gange. Hützudags het s Drämli sis äigene Brüggli e baar Meter bachuf.[2]
Gschicht ändere
Scho in römische Zite het s dört e Brugg über d Birs ghaa. Au im Middelalter het braktisch dr ganz Handel us em Schwööbische und Elsässische, wo über Baasel gange isch, d Joggelibrugg benützt, und vo dört isch s über e Hauestäi ins Middelland gange. Zum erste Mol wird 1102/03 e Brugg erwäänt, aber das isch woorschinlig eender e Basserelle für Fuessgänger gsi. 1425 het d Stadt Baasel, wo 1295 de Groofe vo Frohburg s Furt- und Bruggerächt abkauft het, e chli bachab vom alte Brüggli e Brugg us Stäi lo baue, wo grooss gnueg gsi isch für Waaredransbort. Woorschinlig denn het mä die ursprüngligi Bezäichnig vom Ort, wo Birsbrugg oder äänlig gsi isch, dur St. Jakob ersetzt (zum erste Mol 1418 as „ze sant Jacob an der Birsse“ belegt). Näbe dr Brugg het s woorschinlig scho vo Aafang aa e Zollhuus gha. Dr Läächemaa[3] vom Wirtshuus vo St. Jakob isch gliichzitig au dr Zöllner gsi, bis 1847/48 mit dr Gründig vom Schwizerische Bundesstaat die interkantonale Zollgränze ufghoobe worde si.
Fuessnoote ändere
- ↑ Quartier-Kurier, Nr.3, Septämber 2007 Archivlink (Memento vom 4. März 2016 im Internet Archive), abgrüeft am 29. April 2014
- ↑ Strecke: St. Jakob - Muttenz (1921) uf tram-basel.ch, abgrüeft am 29. April 2014
- ↑ hüte Pächter
