Benutzer:Holder/Gedanke

E baar Gedanke zue dr Alemannische Wikipedia

D Diskussion, was firigi inhaltlige Schwärpinkt sotte gsetzt wäre, eb Artikel, wu nit regional sin, sinnvoll sin oder nit, die Diskussion isch nit nei, die isch eso alt wie di Alemannisch Wikipedia.

S het vu Aafang aa Lyt gee, wu regionali Theme bschribe hän, un sonigi, wu anderi Artikel verfasst hän. Vum Aadail här mache di regionale Theme vu Aafang aa un bis hite uugfehr d Helfti uus.

S het vu Aafang aa Lyt gee, wu in dr Hauptsach ibersetzt hän, un sonigi, wu aigeständigi Artikel gschribe hän. Dr Aadail vu dr Ibersetzige lyt hite bi rund eme Drittel, was ender weniger isch wie vor fimf oder zeh Johr.

S het au vu Aafang aa zimli gueti Artikel gee un zimli schlächti, des het si au nit gänderet im Lauf vu dr Johr. Aigeständig gschribeni Artikel sin im Ibrige au nit uubedingt besser wie Ibersetzige, do het s sonigi un sonigi, wie au bi dr Ibersetzige.

D Artikel, wu uuszaichnet wore sin (bsundersch glungeni oder läsigi), sin scho alliwyl nume ne chlaini Minderhait gsii.

Ich find au, ass di Alemannisch Wikipedia hite sprochlig uf eme hechere Nivoo isch wie friejer, d. h. necher am gschwätzte Dialäkt.

Mii persenlig inträssiert wenig, eb en Artikel ibersetzt isch oder eb er aigeständig gschriben isch. Mii inträssiert vor allem, eb en Artikel bi uns sprochlig un inhaltli guet isch, un nit wien er im Verglych zum dytschsprochige Artikel isch.

Mir hän doch scho ne baar zimli gueti Artikel ghaa, wu bis uns aigeständig gschribe un wu derno vu eberem uf Dytsch ibersetzt wore sin. Dr Albärt het si großi Miei gee bim Artikel Oberrotweil un dr Terfili bim Artikel Albanische Volkstrachten. Un au wänn d dewiki d Versione importiere duet, dr Läser merkt des jetz nimi, ass dr Artikel urspringli vu uns gsii isch, dää siit, wänn er verglycht, nume, ass bi uns dr nämlig Inhalt stoot. Sin sonigi uf dytsch ibersetzti Artikel jetz uf aimol sinnlos?

Mir sotten is nit verglyche mit dr dytschsprochige Wikipedia, bi däm Verglych cha di Alemannisch Wikipedia nume schlächt abschnyde. Dert het s doch zue allne Theme vyl mee Lyt, au zu allne regionale Theme.

Vu dr Theme här find i sotte mir do verschideni Schwärpinkt haa:

Mir sin e Dialäkt-Wikipedia, wäge däm find i alli Theme wichtig, wu s um Dialäkt goot, au wänn s kaini alemannische sin.
Mir sin e regionali Wikipedia, wäge däm fin i alli Artikel wichtig, wu s um d Region goot, un do verstand i unter dr Region nit nume die Biet, wu Alemannisch gschwätzt wird, nai, fir mii ghert di ganz Schwyz zue dr „Region“, ganz Bade-Wirttebärg, ganz Bayerisch-Schwobe, s ganz Elsass (un wurum nit au Lothringe?), derzue natyrli au Vorarlberg, Liechtestai un d Sidwalserderfer.
Mir sin e Enziklopedy, wäge däm find i au Artikel wichtig, wu ne allgmaine Iberblick iber s Wisse gän, z. B. die Artikel.
Mir wän Läser inträssiere fir alemannischi Dialäkt, wäge däm find i alli Artikel wichtig, wu d Lyt dusse inträssiere, un des chenne ebe au internationali Popstar, Sportlerne oder aktuälli Eraignis us aller Wält syy.
Un zletscht: Mir wän Lyt motiviere zum Mitschrybe, wäge däm find i s wichtig, ass do bi uns e jede syne persenlige thematische Vorliebe cha noogoo.

Syt rund zeh Johr wird in dr Alemannische Wikipedia driber spekuliert, was d Läser iber unser Projäkt dänke un was si dervu erwarte. Uf dr Syte „Wikipedia:Ussespiegel“ sammle mir scho syt e Huffe Johr Hiiwys un Kommentar zue dr alswiki uf allne meglige Internetsyte. Insgsamt hämer dert scho fascht 1000 (!) Syte zämedrait. Uf kaire ainzige vu däne Syte haan i je gläse, ass sich eber driber beschwärt, ass in eme Artikel uf dr alswiki nume s Glych stiend wie im nämlige Artikel uf dr dewiki, uf kaire ainzige! Un do het s e Huffe kritischi Kommentar derby, au Hiiwys uf inhaltligi Fähler, aber d Ibersetzige sin no nie grundsätzli kritisiert wore.

Ich haa im Ibrige scho vylmol feschtgstellt, ass es Lyt, wu sich nit uuschänne dermit, wie d Artikel gschribe wäre, Wunder nimmt, wänn i ne verzelle due, ass sich d Artikel in dr verschidene Sprochversione normalerwys unterschaide. Do froge fascht alli, fir was des guet soll syy.

Ich main, dr Wärt vu dr Alemannische Wikipedia lyt vor allem dodin, ass si im Dialäkt gschriben isch. Bishär cheme d Läser zue uns doch weniger, wel si uf dr Suechi no mee Informatione sin, nai, si cheme, wel en Enziklopedy im Dialäkt (au fir Schwyzer) allno uugwehndli isch.

Holder, Merz 2016