Mpa swiss
Hoi zäme,
I bi vome Dorf am Zürisee. Ufgwachse am undere Ändi (linggs i der Flüssrichtig). Jetz woni aber scho lang wiiter seeufwèrts - immer no uf de Schattesiite, aber schöner/läntlicher/mee im Grüëne und mit Uusblick uf de See (d Ufenau zum Biischpiil, und Rappi deet ganz hine im Egge). Und wänns klaar isch uf d Bèrg : de Glèrnisch und de Säntis (und no anderi natürli) - suscht halt nume de Etzel.
I d Schuël bin ich siinerziit uf Züri, ad Töchti (haha - au wäni mi nië als "höcheri Tochter" gfüült han). Und dänn hani es Schtudium aagfange, aber nöd fertig gmacht. Aber das isch jetz scho mee als es halbs Jarhundert hèèr. Spöter hani a Ziitlang z Ängland gläbt, bevori wider an Zürisee cho bin.
Geschaffet hani dänn (mit Fröid, und fascht mis ganz Pruëfsläbe) anere bekannte Technische Hoochschuël, aber nu im Adminischtratife Beräich. Das isch schön gsii: Anderne (wo zum Täil vo wiit hèr cho sind, us fèrne Länder) chöne z hälfe bim Verfasse vo Täggscht (Briëf, Ii-meïl, ander Schriftschtück - näbet langwiiligere Arbete). S Formuliëre isch mer gläge und s internazionaal Umfäld au. Da bini rundume glückli gsii. Hüt, bim Gaartebeetli jätte und em Maa bim Holze hälfe, tänki gern draa zrugg.
Uf Wikipeedia bin i läider nu sälte. Uf em hochtüütsche Wiki hani emaal en Artikel kreïert, über de verstorbni Maa vonere Fründin. En Wüsseschaftler. Si hät sich das gwünscht und mer Infos gliferet, und me hät inn (und sini Arbete) au online gfunde. Und äine vo sine ehemalige Koleege hät mi underschtützt, damit i (wüsseschaftlich) käin Schmare gschribe han. Wil: iich sälber wäiss ja nüt i dem Beräich, und (wiëni ha müëse feschtschtele) au suscht nüüt à foñ. Ales nume Halbwüsse...
Vo dem Artikel abgsee, tuën i drum nume bitzele. Vilicht en feelende Link setze, da und deet öppis verbessere (au uf Änglisch, Französisch, Holändisch - wäns näimet nötig isch), nach Beleeg faande - wäni en Idee han, wo suëche. I wür scho gërn wider emaal öppis Ganzes aaphacke. Wän öpper en Idee hett, "was guët wër, wäme würd..." Aber es törfti nöd prässiëre und es müëst öpper ume sii, womer chönti hälfe : Infos gë oder vermittle. Das wèr supper !