Bewegig fo dä Landarbeitr oni Bodä
D' Bewegig fo dä Landarbeitr oni Bodä (uf portugisisch Movimento dos Trabalhadores Rurais Sem Terra), mängisch nenntme si ou Bewegig fodä Landloose (Movimento dos Sem Terra), abgchörzt MST, esch ä Massäbewegig z'Brasilie, wo säch för a radikali Landreform iisezt o zodäm o soziali o politischi Fordrigä schdöut. D'Bewegig hed 1991 dr sognannti Autärnatifi Nobäubriis bercho.
Dr Grong werom d'Bewegig entschdangen esch esch di äxdreem unglichi Landverdeilig z'Brasiliä, wo öppä 10 % for Bevöucherig öppä 80 % fom Land het. Zom Biischbiu ghörä 20 Millionä Hektar Land nor 20 Grossgrungbsitzer, o uf dr angere Siite gits 3,3 Millionä Chliibure wo zämegrächnet ebäsoviu Lang hei. Fodä Bödä, wo Grossgrundbsitzer odr Konzärn ghöra, si öppä d'Heufdi ungnutzt. Hüüfig si si nor "Schbekulazionsobjäkd", das heisst, Schbekulante choufe ds Gländ, oms när tüurer wiiterzvrchoufä.
Zwor isch d Landfraag (questão agrária) z'Brasiliä kes neus Tema, o es hed ir Gschechd scho mereri Landlosebewegigä gä. Di si abr entwädär fom Militär ongärdröckt wordä odr dör Abwanderig fodä Landlosä i Rechdig Amazoniä ufglösd wordä.
Gmäss MST göutä fougndi Groppä as Landloosi:
- posseiros (di hei Land oni offizieue Bsitzertitu; nach 30 Jaare wörds Land gmäss Gsetz ir Eigetuum wärde; das isch aber praktisch fasch undurfürbar, wöu d'Landarbeiter fo verschidne Siite schdändig bedroot wärde.)
- assalariados (Loonarbeitr), boia-frias o diaristas (Daglööner)
- parceiros (Pächdr; d'Summe wosi müend zaale ische Prozäntsatz vo irem landwirtschafdleche Ertraag)
- meeiros (Pächdr, wo am Landbsitzer genou 50 % müend zaale)
- arrendatarios (Pächdr, wod Summe, wo si müend zaale, im Voruus abgmacht werd)
- pequenos agricultores (Chliibuure med maximum 5 Hekdaare Land)
D' "Vorlöifer" fom MST esch i dä 1970er Jaar em Südä fo Brasiliä entschdange; i dere Ziit hed d'Modärnisierig bewirchd, dass veli "agroinduschdrielli" Großbetriib entschdange si, wo Produkt härgschdeut hei, wo förä Export dänkt gsi si; uf dr angere Siite hei feli Landarbeitr dür di wachsendi Mechanisierig iri Arbet ferloorä. D'Aahänger vom MST repräsentiere sodemit eigendlech d' Verlierer for landwertschafdlechä Modärnisierig in Brasiliä.
Wiu di angerä Organisazione (wos no gid) mit ähnleche Ziil z'wenig revoluzionär i Erschiinig träte si, o med der brasilianischä Regierig z' "konformischdisch" gsi si, si föu (Landarbeiter) zor MST überträtte. MST isch wäg däm zorä wechdigä "gsamtgsöuschafdlech" relewantä sozialä Bewegig z'Brasiliä ufgschdegä, wo d'Absicht verdreit, di gsamti Gsöuschafd z'verändere. Das wot si bewirke mit kollektivä "Akzionsformä" o Löösigä (zom Bischbeu Gnossäschafdä); MST wod au d'Bedütig (Wichdigkeit) for "Arbet" öber d'Bedütig fom sognannte Kapitau hervorhebe; o si kämpfeno för soziali Grächdigkeit o gäg d Diskriminiärig for Frou. Iri Akzionä fougä äm Prinziip for Gwautlosigkeit; si sii derbi motiviert dürä chreschdlech (meischdens katolischä) Gloube. In fäkt, d'Ideaal for Landloosebewegig isch näch bir Befreiigsteologii (Teologia da Libertação).
Ds MST esch formeu gröndäd wörde 1984 ir Schdad Cascavel (im brasilianischä Bundesschdaat Paraná). Da esch möglech worde dank dr Demokratisierig wo denne öppe ufghört het nach 20 Jaar Militärdiktatuur (1964-1985): Wärend dr Regierigsziit fom Presidänt José Sarney hei d Großgrungbsitzr d' Plään fore Landreform sabotiert, midhiuf fo bewaffnetä Milizä (ned ganz zverglichä mid dä kolombianischä Paramilitärs). As Gägäbwegig hei sech di Landloosä mid Hiuf for Chilä (CPT) organisiert.
Sii Iidrock o sini Popularität het sech dr MST vor auäm dür irä konkretä Akzionismus verschaffed. Derzue ghörä fougendi Akdivitäte:
- Si bsetze (eifach so) brachligends Land odr Land, wo schlächd gwirtschafded wird, uf das abä si immr wider Forderigä zor offizielle Enteignig fo dene Gländ gfordered wärde (ebe mit däm Argumänt, dass ds Land, anschdatt dasses guet gnutzt würdi, nor umeschbekuliert würdi) - damit di arme Landlose das Land nachhär sinnvoll koltiviere chöi. Drnäbä wärde ou "symbolischi Ländereie bsetzt, wi zom Biischbeu dr Landbesitz fom damalige Presidänt Cardoso im Jaahre 1999 - om Uufmerksamkeit z'erregä. Bidenä Landbsetzigä, de sognannte acampamentos ("chlei go zäutlä"), wärdä (oni gsetzlechi Basis) es baar Familiä (so öppä 250-500 ide meischde Fäu) ufem bsetzte Land aagsidlet, wo im Raame fore "Produkzioonsgmeinschafd d'Produkzionsmittu gmeinsam verwaute o gmeinsam gschueut wärde,¨demit di Gmeinschafd när en effiziänti Produkzioon cha uufboue. Drbii werd immr d'Wechdigkeit for "Kollektivität" gägenöberem Individuum betoont.
- Großchondgäbige (wi zom Biischbeu 1997 dr Schdärnemarsch zor brasilianische Houptschdat Brasília, wo buechschdäblech 40.000 Lüt mitgmachd hei), sognannti "Hungrmärsch, Bluetschbändiakzioone u no einigs meh.
Was o no ghoufe hed, dass dr MST immer wechdiger worden isch, isch gsi, dasses bluetigi Repressionä vom Militär, for Regierig odr ou fo privatä Milize gä hed. 1996 heds zom Biischbeu es Massaker z'Eldorado de Carajás gäh, wo 19 MST-Aktivischde umcho si.
Bis Ändi 1990er Jaar heds dr MST gschaffed, för öppä 350.000 Familiä Land erchämpfe. Verglichä mit dr grossä Zahl fo verbliibende 4,5 Millione landlose Familiä esch das aber eender wenig. Ir Metti vom erschde Jahrzänt fom neue Jartuusig esch ds MST i 23 fodä insgsamt 26 brasilianischä Bundesschdaate aktif, u betröit öppe 1,5 Millionä Landloosi.
Under dr gägewärtige Regierig fom Luiz Inácio Lula da Silva (einigi MST-Mitglider ghöre zor Partei (Partido dos Trabalhadores) fom Presidänt), sid Schansse förä Bodäreform so gross wi si no niä gsi si ir Fergangäheid. Trotzdäm wiu sechdr MST ned inä politischi Partei verwandlä. Iri jungä o radikalä Füürer löi sech ou ned eifach so ire Aktivismus nä.
Literatuur
ändere- Günther Schulz: Landbesetzung – Hoffnung für Millionen (Landbsetzig - Hoffnig för Millioone). Eichstätten 1995
Witerfüerändi Lingg
ändere
Commons: MST – Sammlig vo Multimediadateie- Houmpeitsch fom MST of Portugisisch
- Houmpeitsch of Dütsch - amigas e amigos do MST/Deutschland
- Houmpeitsch dütsch - infoterra/Schwiiz
- Houmpeitsch of änglisch - amigas e amigos do MST/USA
- Página oficial
- Página oficial da Via Campesina
- Dr Lula sött, gmässem MST, de Ideä fom Hugo Chávez fougä, Nachrichtä fo BBC fom 12. Jänner 2005 (of portugisisch).
- Dr Chávez trifft Verträtter fom MST u angere soziale Bewegige fo Brasilie; bedi tüend em Lula Unterstützig zuesäge, Nachrichdä fom Diário Vermelho, 13. Ougschd 2005]
- Dr Chávez bsuechd e Landbsetzig fom Chávez o paktiert mid ehne (Site cha nüme abgrüeft wärde; Suche im Webarchiv) Jornal dos Trabalhadores Rurais Sem Terra, Uusgab "XXIII - número 248", Februar 2005.
