Bichwilerlied

S Bichwilerlied isch d Dorfhymne vo Bichwil, wo im Ondertoggeborg litt. Die Dorfhymne isch ane 1965 vom Sales Hueber us Wittebach gschrebe wore zom 1100 jöörige Jubilääum vo Bichwil. S zwaistimmige Lied isch i f-Dur und im Viervierteltakt. S hett fööf Strooffe zu acht Zile und hett e ken Refrain. S Lied werd enner langsam gsunge, echli bhäbig miteme fiirliche Iischlaag. De Teggscht bitoont de seer ländlichi und abglegni Charakter vom Dorf und zaigt e gwösse Humoor.

Originaalteggscht

Du finscht üs nöd im Fahrteplan,
mer wohnet nebet osse
ond wer of Bichwil ue cho will
mues halt sis Velo stosse
Ond glich hang ii met Liib ond Seel
am stille Dorf do obe.
Sit tusig ond scho hondert Johr
sind mer do guet uufghobe.

Es keis vo Uzwil, keis vo Wil
ond keine vo Sanggale
mues meer vo Stadt ond Isebahn
ond Kino cho go brale.
Es gitt för üs ken schönnre Flegg
als Bichwil of sim Högel
Ond Engel hets fascht luter döt,
nu hends bis hüt kei Flögel.

Es mues jo si kei grossi Stadt
met Hüserblögg ond Schloote,
ond s mues nöd all Tag früe bis spoht
grad lärme wiä noch Noote.
Doo z Bichwil gohts no rüebig zue,
ghörsch höchstens d Glogge lüüte.
Ond wer e Jässli chlopfe will,
dem tuet mers nöd verbüüte.

Nöd blos im Dorf, au z Reggetschwil,
ond z Langenau, im Bueche,
ond i de Rudle ond z Ramsau
muescht d Bichwiller go sueche.
Du chascht der of em Eppeberg
nöd gnueg dis Aug erlabe,
gsiescht wiit is flachi Fürschteland,
sogär is Turgi abe.

Mer wohned nööch am Himel zue,
dromm simmer brav ond zfrede.
Ond wemmer au nöd ales hend,
mer wönd do obe bliibe.
En Hoogge findscht wohl öberall,
chascht hi, wo d wötsch go luege,
De Liäbgott sorget scho för üüs,
dass nünt keit us de Fuege.