Bonifatius VII.

Dr Bonifatius VII. (* z Rom; † Juli 985), aigetli Franco, Suhn vum Ferrucius, isch anne 974 Gegepapscht un 984/85 Papscht gsii.

Läbe

Dr Kardinaldiakon Franco isch uf Bedrybe vu remischer Adlige unter em Crescentius de Theodora as Gegepapst gege dr Benedikt VI. gwehlt wore, wu dur dr vum Bonifatius aagstiftete un bstochene Prieschter Stephan un däm sym Brueder 974 ermordet woren isch. No nume sechs Wuche het dr Bonifatius VII. aber vor em Otto II. uf Byzanz mieße flichte, doderby het er Schätz vu dr Peterschilche mitgnuu. Dr Papscht Benedikt VII. het en dodruf exkommuniziert.

Wu dr Otto gstorben isch, isch dr Bonifatius 984 uf Rom retuurchuu un het dr Papscht Johannes XIV. gfange nee un in dr Ängelsburg yykärker loo un het si sälber zum Papscht ernännt. Am 20. Augschte 984 isch dr Johannes XIV. vermuetlig ermordet wore. Elf Monet druf isch au dr Bonifatius gstorbe, vermuetli gwaltsam. S remisch Volk het sy Lych gschändet un dur d Stroße gschlaipft.

Scho zue syne Läbzyte isch dr diktatorisch Bonifatius VII. e Malefatius (= eber, wu Beses macht) un e horrendum monstrum (d. h. furchtbar Unghyyrr) gnännt wore.

In syre zwoote Amtszyt wird dr Bonifatius VII. zmaischt as rächtmäßige Papscht aagluegt, au wänn des wäg sym Läbeswandel umstritten isch. Dr negscht Dreger vum Name, wu si Bonifatius VIII. gnännt het, het aber d Legitimitet vum froglige Pontifikat vum Bonifatius VII. schyns anerkännt, wie mer us syre Nameszellig cha schließe.

Literatur

• Paolo Delogu: BONIFACIO VII (papa). In: Alberto M. Ghisalberti (Hrsg.): Dizionario Biografico degli Italiani (DBI). Band 12 (Bonfadini–Borrello), Istituto della Enciclopedia Italiana, Rom 1970 (italienisch).
• Rudolf Schieffer: Bonifatius VII. In: Lexikon des Mittelalters (LexMA). Band 2, Artemis & Winkler, Münche/Züri 1983, ISBN 3-7608-8902-6, Sp. 414.
• Friedrich Wilhelm Bautz: BONIFATIUS VII. In: Biographisch-Bibliographisches Kirchenlexikon (BBKL). Band 1, Hamm 1975, Sp. 689–690.
• Thomas Oestereich: Boniface VII (Antipope). In: Catholic Encyclopedia, Band 2, Robert Appleton Company, New York 1907 (änglisch)

Fueßnote

Vorgänger	Amt	Nachfolger
Johannes XIV.	Papscht 984–985	Johannes XV.

Dä Artikel basiert uff ere fräie Übersetzig vu dere Version vum Artikel „Bonifatius_VII.“ vu de dütsche Wikipedia. E Liste vu de Autore un Versione isch do z finde.