Calixt I.

Dr Calixt I. (au Callist I., Kalixt I. Calixtus I. oder Kallixtus I.; * vilicht um 160; † 222), isch vu 217 bis 222 Bischof vu Rom gsii. Sy Amtszyt isch in dr Zyt vu dr remische Chaiser Elagabal un Severus Alexander gsii. Sy Name bedytet „dr Schenscht“ (griechisch/latynisch).

Calixt I.

Läben un Pontifikat

Iber dr Calixt I. isch wenig bekannt. Dr hailig Hippolyt vu Rom, e Zytgnoss un Widersacher vum Calixt, verzellt iber en: As junge Sklav isch dr Calixt vu sym Herr fir d Ufsicht vun ere Bank bstellt wore – är het aber s Gäld verlore, wun em vu andere Chrischten aavertröut gsii isch. Är isch vu Rom gflichtet, isch aber uf eme Schiff feschtgsetzt wore. Go dr Sklaverei entgoh isch er ab Schiff in s Wasser gumpt. Är isch grettet un uf Carpophorus retuur brocht, uf Firbitte vu syne Glaibiger aber freigloo wore. Si hän ghofft, är chennt wider e weng vum Gäld zämebringe. Är isch aber wider feschtgnuu wore, wu s in ere Synagog zuen eme Kampf chuu isch. Dr Calixt het versuecht ghaa, Schulden yyzdryyben oder Gäld z leene. Derno isch er in Bärgböumyne vu Sardinie gschickt wore.

Anne 190 isch dr Calixt mit em Hippolyt vu Rom un e baar andere Chrischten uf Bitte vu dr Marcia, ere Konkubine vum Chaiser Commodus, freigsproche wore. Sy Gsundhait isch aber eso aagschlaa gsii, ass er uf Antium gschickt woren isch, wun er si erholt het un e Ränte vum Bischof Viktor I. iberchuu het.

As Bischof vu Rom het dr Calixt I. dr Generalabloss yygfiert, d Vergäbig vu allene greite Sinden ohni Bueßzyt. Sy Zytgnoss Hippolyt, wu villicht ab 217 as Gegebischof vum liberalere Calixt I. amtiert un dodermit villicht e Schisma uusglest ghaa het, isch wietig gsii, ass sogar Merder, Ehbrächer un Lyt, wu Uuzucht dribe hän, an dr hailige Kommunion hän derfe derbysyy, wänn ihri Sinde si greit hän.

Dr Calixt isch au gege d „Irrlehr“ vum Sabellius ufdrätte, dr modalistisch Monarchianismus, dr Hippolyt het em doderby wider vorgworfe, är diei nit yyfrig gnue dergege vorgoh.

Villicht isch dr Calixt um 222 as Märtyrer bi me Volksufstand gstorbe. Fir d Legänd, ass er an dr Stell vu dr hitige Chilche San Callisto in e Brunne gheit woren isch, git s aber kai Beleg. Är isch uf em Chilchhof vum Calepodius an dr Via Aurelia begrabe wore. Syni Reliquie sin im 9. Johrhundert in d Abtei Cysoing bi Tournai, speter au uf Reims, Fulda, Neapel un in e baar Chilche z Rom iberfiert wore.

No sym Dod het si dr Presbyter Hippolyt as Haupt vum Ditheismus nomol zum Bischof vu Rom ufstelle loo, het si aber nit chenne duresetze geg dr Urban I. un speter dr Pontianus. Bis 235 het er si aber chenne as Gegebischof behaupote.

Noch em Calixt isch d i remisch Calixtus-Katakombe gnännt, wun er vor syre Bischofszyt as Diakon verwaltet ghaa het. Är wird z Todi z Italien as Märtyrer verehrt, sy Gedänkdag isch dr 14. Oktober. In dr Chunscht wird er zmaischt mit ere rote Roben un ere Tiara dargstellt oder mit eme Miilistai um sy Hals, vylmol au mut eme Brunnen in dr Nechi.

Literatur

• Friedrich Wilhelm Bautz: Calixt I. In: Biographisch-Bibliographisches Kirchenlexikon (BBKL). Band 1, Hamm 1975, Sp. 858–859.
• John Chapman: Pope Callistus I.). In: Catholic Encyclopedia, Band 3, Robert Appleton Company, New York 1908 (änglisch)

Weblink

 Commons: Calixt I. – Sammlig vo Multimediadateie

• Callistus I. im Ökumenische Heiligenlexikon, abgruefen am 18. Mai 2011
• Gsamtwärch vu Migne Patrologia Latina mit Inhaltsverzaichnis

Vorgänger Zephyrinus

Bischof vu Rom Dr Titel Papscht isch anne 384 zum erschte Mol brucht wore. ca. 217–222

Nochfolger Urban I.

Dä Artikel basiert uff ere fräie Übersetzig vu dere Version vum Artikel „Calixt_I.“ vu de dütsche Wikipedia. E Liste vu de Autore un Versione isch do z finde.