Dr Caritas-Brunne z Baasel

Koordinate: 47° 33′ 30,9″ N, 7° 35′ 44,8″ O; CH1903: 611828 / 267554

Dr Caritas-Brunne
Dialäkt: Baseldütsch

Dr Caritas-Brunne befindet sich am Theodorskiirchblatz 7 im Chläibaasel. Er stoot nit under Dänggmolschutz[1] und isch aber äins vo de Baasler Kulturgüeter, wo für d Region vo Bedütig si.

Dr Brunne stoot im Innehoof vom Waisehuus, wo 1669 in dr ehemoolige Kartause iigrichdet worde isch. Dorum cha men en numme am Daag go bschaue. Ooben uf em Brunnestogg stoot d Caritas, wo sich um Kinder kümmeret. Die Figur stammt us em Joor 1677, dr Brunnedroog isch sithär usgwäggslet worde.[1] Dr Brunne isch e Wärgg vom Binniger Stäihauer Balthasar Hüglin, wo in dr Stadt no anderi Brünne entworfe het wie, wi mä dänggt, dr Wääberbrunne in dr Stäine und dr Neptun-Brunne am Münsterblatz 14.[2]

Bim Vogel Gryff, wo jedes Joor im Januar stattfindet, daucht dr Wild Maa si Danneböimli in s kalte Wasser vom Caritas-Brunne und sprützt d Kinder, wo umestönde, drmit aa.[3]

Litratuur ändere

  • François Maurer-Kuhn: Kunstführer Kanton Basel-Stadt, Büchler-Verlag, 1980, S. 146
  • Helen Vischer, Irène Zurkinden: Basel, Origo Verlag, 1956

Fuessnoote ändere

  1. 1,0 1,1 Caritas-Brunnen uf brunnenfuehrer.ch
  2. Neu erstellter Neptunbrunnen bei der Theaterpassage uf altbasel.ch
  3. Helen Vischer, Irène Zurkinden (1956), op. cit.