Dr Wääberbrunne in dr Basler Stäinevorstadt

Koordinate: 47° 33′ 11″ N, 7° 35′ 20,1″ O; CH1903: 611313 / 266938

Dr Wääberbrunne
Dialäkt: Baaseldütsch
Dr Bannerdrääger oobe uf em Brunnestock

Dr Wääberbrunne isch en öffentlige Brunne z Baasel an dr Stäinevorstadt 23, näbe dr Zumft zu Wääber. Er gältet as e Baasler Kulturguet, wo für d Regioon vo Bedütig isch.

Gschicht ändere

Dr Brunne stammt us em spoote 17. Joorhundert. 1837 het mä dr Brunnedroog nöi müesse baue, aber scho 1884 häi vili dänggt, ass er nume im Wääg sig. Dr Regierigsroot het aber andersch dänggt, und dr Brunne isch bliibe. 1925 isch s wider zu Diskussione über e Brunne cho, wo aber sine Gegner au denn nüt brocht häi, und dr Brunne isch in däm Joor ans stedtische Drucknetz aagschlosse worde. 1995 het mä dr ganz Brunne renowiert.

Dr Bannerdrääger isch 1672 uf em Brunnestock ufgstellt worde, villicht vom Balthasar Hüglin, und söll e Daarstellig vom Groof Oswald vo Thierstäi si, wo im Burgunderchrieg d Baasler Drubbe gege dr Karl dr Küeni aagfüert het, was aber gar nid sicher isch. Uf em Schild stöön die vier Buechstaabe SPQB, was "senatus populusque Basiliensis" bedütet, also ass dr Root und s Volk dr Brunne gstifdet häi. Uf dr äinte Site vo dr Faane isch s Wabbe vo dr Zumft zu Wääber und uf dr andere e Baaselstaab. 1898 het mä dr Ritter gflickt, iin grau aagmoolt, s Fäänli mit em Baaselstaab und em roote Gryff nöi gmoolt, und dr Iigel, s Symbol vo dr Wääberzumft wo bi de Füess vom Bannerdrääger hoggt, vergoldet. Für d Bundesfiir 1901 het mä dr ganz Brunnestock farbig aagmoolt und het im Ridder e gröösseri Faane zum heebe gee und brombt isch si Arm abbroche. Mä het en brovisorisch gfliggt und 1925 het dr Carl Gutknecht e Kopii gmacht. Dr ursprüngligi Brunnestock samt em Ridder isch in s Historische Museum cho. 1968 isch d Statue no äinisch nöi aagmoolt worde.

Kwelle ändere

  • Webernbrunnen uf Basler Bauten, abgrüeft am 1. Septämber 2014
  • Der Webernbrunnen uf dr Website vo dr Zumft zu Wääber, abgrüeft am 1. Septämber 2014