Carschenna

Dialäkt: Ùndertòggeborg

Carschenna isch e Maiesäss oberhalb vo Sils im Domleschg. Es isch bikannt wore, dur meriri Felse, wo prähistorischi Felsbilder zaiget.

Die Felsbilder sind 1965 entdeckt wore, wo e Hochspanigslaitig quer dur s Bündnerland zoge woren isch. Dozmol het mer 10 Felse mit Gravure gfunde, wo vom Rätische Museum fraiglait wore sind. 1984 und 1996 sind i de nöchere Umgebig (Badugnas, Viaplana) nomol zwee Felse gfunde wore.

Uf dene Felse findet mer hoptsächli konzentrischi Ringmuster mit eme Loch i de Mitti. Aber au Tier, wo mer nöd immer aidütig zoologisch iiordne cha; doch sind au Ritter und Saumtier mit ere Last uf em Rugge dargstellt. Anderi Sujet sind Chrajefüess, Gitter oder Sunesymbol. Do uf rätoromanisch s Wort carschen, carschaint, creschaint "Noimoo, wachsete Moo" bedütet, nint mer aa, as die Felsritzige astronomischi Bedütig hend, doch gönd d Spekulatione wiit usenand. Und au i de zitliche Iiornig isch mer ales anderi as ainig. Datierige gönd denn vo de Jungstaizit bis i d Isezit (3000 - 500 v. Chr.). Weg em Ritter sött mer allerdings die Bilder nöd allzufrüe asetze. Vermuetet werd au, ass die konzentrische Ringmuster älter sind as die andere Figure. De Vergliich mit de Felsbilder vom Val Camonica z Italie, wo us de Isezit stammet, macht d Datierig i d Bronzezit am maiste woorschinli.

D Felsbilder sind vo Thusis us z Fuess inere Stund erraichbar und befindet sich uf de Alp Carschenna unter de Hochspanigsmaste. Achtung: Nume uf de Wege bliibe (Wegwiiser: Crap Carschenna, Felsbilder)! Nöd uf d Felse laufe und uf de Bilder umetrample, si sind 3000 Joor alt und vo unschätzbarem kulturhistorischem Wert!

Galeri

Hauptfels, ev. en Altoor
Konzentrischi Ring
Sunesymbol
Nöd dütbari Zaiche
Saumtier mitere Last
Chraijefüess

zom Lese

Helvetia archæologiaca, 1997 vol. 28; no. 11-12. ISSN 0018-0173

Weblink

Carschenna uf felsbildermuseum.at (zur Zyt nöd abrüefbar)
Prähistorische Felsbilder in Carschenna uf da Webita vo da Gmaind Sils i.D.