Domleschg

Dä Artikel behandlet es geografischs Gebiet. Witeri Bedütige findt me do.

S Domleschg (rätoromanisch Tumleastga) isch es Gebiet im Bündnerland, Schwiz.

En Blick is Domleschg i Richtig Norde, vom Crap Carschenna oberhalb vo Sils im Domleschg

Geografii

Grob gsait lit s Domleschg zwüsched da Viamala im Süda und da Kluus südlich vo Rhäzüns im Norda. A strengeri Iitailig nännt nu d Dörfer i däm Gebiet, wo uf da rächta, öschtlicha Sita vom Hinderrhii ligged. Mängmol werded au d Ortschafta Realta, Cazis, Summaprada und Thusis dezue zellt, wo uf da lingga Sita vom Rhii ligged. A chli i da Höchi, a da weschtlicha Talsita, gegenüber vom Domleschg liit da Hainzabärg und dehinder s Safietal. Hinder da öschtlicha Bärgchetti isch d Lenzerhaid.

Politeschi Geografii

Politisch händ bis Endi 2015 d Ortschafte rächts vom Hinderrhii zum Chrais Domleschg und dia uf da lingga Sita zum Chrais Thusis ghört. Baidi Chrais sind em Bezirk Hinderrhii zuetailt gsi, wo aafangs 2016 dur d Region Viamala ersetzt worden isch.

Im Domleschg liggend folgendi Gmainda, Städt und Dörfer, resp. Frakziona:

• Domleschg, a politischi Gmaind, entstanda 2015 us däne ehemoliga Gmainde
  • Almens (rätoromanisch Almen)
  • Paspels (rät. Pasqual)
  • Pratval (dt. = rät.)
  • Rodels (rät. Roten)
  • Tomils GR, an ehemolegi Gmaind, entstanda 2009 us däne ehemoliga Gmainde
    • Tumegl/Tomils (dt. Tomils, rät. Tumegl)
    • Feldis/Veulden (dt. Feldis, rät. Veulden)
    • Schaid (rät. Sched)
    • Trans (rät. Traun)
• Fürstenau (rät. Farschno)
  • mit em Städtli Fürstenau und da Ortschaft Furstenaubrugg
• Rootabrunna (rät. Giuvaulta)
• Scharans (rät. Scharons)
• Sils im Domleschg (rät. Seglias)

Burgaland

S Domleschg hät uf chlinnem Ruum sovil Burga, Schlösser und Ruine, wie chum a Gegend i da Schwiz. E paar wenigi stönd uf da lingga Sita vom Rhii. Ma sait drum au s Burgaland Domleschg.

Vercheer

Dur s Domleschg verlauft d Autobahn A13, maischt rächts parallel zum Rhii. Uf da andere Site vom Rhii isch d Bahnlinie vo da Rhätischa Bahn, wo noch Thusis dänn da Rhii öberquärt und via Sils da Albula noche dur d Schiinschlucht i Richtig Tüüfekaschte füert. D Dörfer im Domleschg, wie au die im Hainzebärg sind dur s Postauto erschlosse. Uf Fäldis gits näbed are Strooss, wo vo Tomils öber Schaid uf d Terasse füert, au a Sailbahn, wo vo Rhäzüns us started.

Weblink

• Jürg Simonett: Domleschg In: Historisches Lexikon vo dr Schwiiz.
• Domleschger Zeitung es Online-Portal