Cavedano

Systematik

Ordnig:	Charpfenartigi (Cypriniformes)
Familie:	Charpfefisch (Cyprinidae)
Underfamilie:	Leuciscinae
Gattig:	Squalius
Art:	Cavedano

Wüsseschaftlige Name

Squalius squalus

Bonaparte, 1837

De Cavedano (Squalius squalus) isch e europäische Süesswasserfisch wo z Italie endemisch isch. Er gliicht starch em Alet (Squalius cephalus), wo nördlich vo de Alpe vorchunnt, und werd mengisch as di gliich Fischart aaglueget.

Uussie

De Cavedano isch e längliche grau-grüene Fisch mit eme groosse Muul. De Buuch isch dütli heller und d Flosse geelbruu. Er werd 60 cm lang und wögt den draiehalb Kilo.

Verbraitig

De Cavedano isch e Fischart, wo z Italie, im Tessin, z Slowenie und i chüstenööche Süessgwässer vo Kroatie vorchunnt. Er mag warmi Flüüssgwässer mit ere starche Ströömig, wo flachi und tüüffi Stele hend. Er lebt au i groosse Seeje am Alpesüüdrand.

Lebeswiis

De Cavedano laicht vom April bis Juli, wenn d Wassertemperatur öber 14 Grad stiigt. Cavedani, wo im See lebet, schwümet zom Laiche i Flussmündige. D Wiibli leget d Aier in e flachi Muelte. D Laarfe und di junge Fischli lebet i Schwärm im flache Wasser i Uufernööchi. Im Alter werd de Cavedano, wo 15i were cha, zom Ainzelgänger.

Büecher

Maurice Kottelat: European Freshwater Fishes; Cornol 2007. ISBN 978-2-8399-0298-4