Cevi

Dialäkt: Winterthurerisch

De Cevi Schwiiz (französisch Unions Chrétiennes Suisses) isch mit öbbe 11'750 Mitglider hinder de Pfadi und de Jubla di drittgröscht Jugendorganisation vo de Schwiiz. Näbet de sibe Regionalverbänd i de Romandie und de Dütschschwiiz ghöred au foif täilwiis national oder international tètigi Arbetsgebiet dezue. Als Mitgliid vu de wältumspanende Verbänd YWCA und YMCA tuet sich de Cevi a chrischtliche Grundwèrt orientiere-n-und a dène drü Läitsätz:

Wir trauen Gott Grosses zu.
Wir trauen Menschen Grosses zu.
Wir trauen uns Grosses zu.

De Cevi Schwiiz tuet d Arbet vu sine Mitglidsorganisatione (Regionalverbänd und Arbetsgebiet) koordiniere, de Gsamtverband gäge-n-usse röprèsentiere-n-und im Raame vu Jugend+Sport Witerbildigs- und Sicherhäitskürs organisiere. Èr isch Mitgliid im Sachverband SAJV, wo d Inträsse vu de Schwiizer Jugendverbänd politisch und gsellschaftlich tuet verträtte. De Name Cevi isch es iträits Markezäiche vum Cevi Schwiiz.

Regionalverbänd

Di sibe Regionalverbänd vum Cevi sind:

Aargau-Solothurn-Luzèrn-Zug
Basel
Bèrn
Oschtschwiiz
Unions Chrétiennes Romandes
Wonterthur-Schaffuuse
Züri

Die Regionalverbänd umfassed jewils meereri Ortsgruppe-n-und füered Usbildigskürs für iri Läiterine-n-und Läiter dure. Jedi Ortsgruppe mues mindischtens e Jungschar, en Ten Sing, e Sportgruppe-n-oder en Ehemaligeveräin abüüte.

Jungschar

D Jungschar isch s Chèrngebiet vum Cevi. I lokale Jungschar-Abtäilige-n-erläbed Chind und Jugenddlichi es vilfèltigs Freizitagebott, wo mäischtens i de Natur tuet schtattfinde. D Jungschar-Agebott sind nachem Prinzip «Lèrne mit Chopf, Hèrz und Hand» vum Zürcher Pègagog Johann Pestalozzi ufbaut. Traditionell ghöred Adacht, Singe, Schpile, Verzele-n-und Tatkund (= Lèrne vu Outdoor-Fèigkäite) zu de zentrale-n-Elemänt vumene Cevi-Programm. Vili Abtäilige mached underdesse-n-aber kei Adachte me.

D Mitglider vu de Jungschar häissed Cevianerine-n-und Cevianer und lönd sich a de farbige Foulards, wo-a irem blaue Cevihämp bambeled, irere-n-Abteilig zueordne. Gägesiitig tüend si sich bi irne Cevinäme rüefe, wo si mäischtens imene Taufritual vo irne Läiter übercho händ. D Jungschar-Gruppe für Mäitli und Buebe-n-im Chindsgi-Alter häissed Fröschli und träffed sich öbbe-n-äinisch bis zwäimal im Monet.

Vili Abtäilige gönd meermals im Jaar ines Lager – im Früelig und Summer mäischtens im Zält. D Meerhäit vo dène Lager wird vum bundesamtliche Schportförderigsprogramm Jugend+Sport underschtützt.

Ten Sing

I de Ten-Sing-Gruppe tüend Jugenddlichi e Büüneshow verwürkliche. Die bestaat mäischtens us Gsang und Tanz, cha-n-aber au mit anderne Show-Elemänt gmischt sii. D Ten-Sing-Gruppe tüend die Schow sälbschtändig als Gmeinschaftswèrch erarbeite-n-und wèrded dadebi dur erfaareneri Ten-Singer gläitet.

Arbetsgebiet

Zum Cevi ghöred näbet de Regionalverbänd foif Arbetsgebiet, und zwar:

Cevi Alpin (Ski-, Snowboard-, Chlätter- und Höchtoure)
Cevimil (Understützig vu Schwiizer Armee-Aghörige)
CVJM-Zäntrum Haslibèrg (Betriib vomene Fèriedorf mit Hotel)
Horyzon (internationali Entwickligsarbet für Jugenddlichi)
«Perspektive Leben» (Agebott für elteri, gloibigi Mänsche)

Gschicht

1768 entstönd die erste Vorläufer-Gruppe i de Schwiiz.
Am 6. Juni 1844 wird de ersti Cevi (bzw. YMCA = The Young Men's Christian Association) vom George Williams in London gründet.
1852 gründet de Henri Dunant die ersti Cevi-Gruppe z Gämf.
1855 füehrt d'Gründig vom Weltbund zu Kontakt zwüschet Gruppe i de Schwiiz und andere Länder.
1864 wird de Schwiizer CVJM gründet.
Scho um 1875 gits i de Schwiiz CVJF-ähnlichi Gruppe.
1902 schlüsset sich d'CVJF-Gruppe us de Westschwiiz zum "Comité Romand" zäme.
S'"Comité Romand" wott sich 1911 em YWCA-Weltbund aschlüsse. Dert werdet sie ufgno, chömed aber no keis Stimmrecht über, wil sie nur en Teil vo de Schwiiz und nur ei Landesspraach vertretet.
1911 gründet de Lord Baden-Powell die ersti Pfadi-Gruppe. In Genf, Bern, Basel, Züri und Sanggalle, i de Waadt und in Nöieburg baut de Cevi Pfadi-Gruppe uf.
1913 wird de Schwiizerischi Pfadibund gründet.
1914-1918 währed em erschte Wältchrieg entstaht d'Soldatearbet.
1918 wird de erschti CVJM-Jugedsekretär für d'Dütschschwiiz iberuefe.
1920 schafft de Cevi Ufethalts-, Lese- und Wärmestube für Arbetslosi und e Volkshochschuel.
1926 schlüsset sich die verantwortliche Fraue vo düütschschwiizerische CVJF-Gruppe em "Comité Romand" a. So wird s'zweite Gsuech um e Aktivmitglidschaft im YWCA Weltbund 1926 bewilligt.
1930 wird in Basel s'1. CVJF Sekretariat vo de Dütschschwiiz eröffnet.
1945 werdet nöiji Leiterchüürs duregfüert.
Ab 1970 wird die hütig erlebnisorientierti Jungschararbet und e systematischi Usbildig ufbout.
1998 schlüsset sich drei Dachverbänd (Cevi Bund, CVJM Nationalverband, CVJF Nationalverband) sowie die selbständige Arbetsgebiet UCF Vaud und FRUC zum hütige Cevi Schwiiz zäme.
Im Jahr 2000 gits i de Dütschschwiiz 185 Jungscharabteilige.

Wie isch es zu de Buebejungschare cho?

Wo d'Idee vom Cevi i d'Schwiiz cho isch, bestönd scho Cevi ähnlichi Gruppe. Si schlüsset sich a de Cevi-Idee a. Dank em Henri Dunant breitet sich de Cevi i de französische Schwiiz schnell us. Agregt durch d'Romands entstönd bald Gruppe i de grosse Städt vo de Düütschschwiiz. De englischi Cevi bringt d'Pfadibewegig i d'Schwiiz. Nach e paar Jahr bildet die Pfadi-Gruppene en eigene Bund. Einigi Gruppe blibet au Mitglider vo de Cevi-Bewegig. D'Chinder- und Jugedgruppe vom Cevi selber sind aber erst sit de 70er-Jahr mit de hütige Form vo de Jungschararbet gwachse. De Seuzacher Realschuellehrer (Oberstuufe) Rolf Wehrli hät die Entwicklig massgeblich prägt. Über die Ziit händ die Cevi-Gruppe mängi schweri Krise z'überwinde ghaa. Jedesmal isch d'Cevi-Bewegig gstärcht us ihne usechoo.

Wie isch es zu de Meitlijungschare cho?

1934 hät de CVJF Nationalvorstand d'Kommission "Nationali Kommission vo de Jungschare" bildet - da häts bereits Meitligruppe ggää. In Basel sind sie als d'Meitli mit de blaue Jupes und de wisse Bluse bekannt.

1967 wird d Susanne Hofer als 1. Sekretärin vo de Meitlijungschar für d'Region Basel agstellt. Gmeinsam mit Fraue us de Region Züri hät im gliche Jahr de ersti Schueligskurs für Jungschiileiterinne stattgfunde. In de nächste Jahr wachst d'Meitlijungschararbet sichtbar. Ab 1981 händ all 5 dütschschwiizer Regione (AG-SO-LU-ZG, Basel, Bern, Ostschwiiz und Züri) e eigeni Jungscharsekretärin. Es sind immer nöiji Abteilige derzue gstosse. I de 90er-Jahre sind i vilne Regione d'Chüürs überarbeitet und veränderet worde.

Dä Artikel basiert uff ere fräie Übersetzig vum Artikel „Cevi“ vu de dütsche Wikipedia. E Liste vu de Autore un Versione isch do z finde.