Charibert II.

Dr Charibert II. (* öbbe 614; † 8. April 632), isch vo 629 bis 632 e merowingische Underkönig vo Aquitanie gsi und het si Sitz z Toulouse gha.

Charibert II.
König vo de Franke im Deilriich Aquitanie
E merowingische Tremissis (e Drittel vom ene Solidus) mit em Bild vom Charibert II.
Regierigsziit	626 - 632
Uf d Wält cho	öbbe 614
Gstorbe	8. April 632
Dodesort	Blaye
Begrabe	in dr Chille St. Romain z Blaye
Vorgänger	Chlothar II.
Dronfolg	Lex Salica: Si Sohn het gerbt, isch aber scho sehr jung gstorbe. S Erb isch denn an Dagobert I. zruggfalle.
Nochfolger	Chilperich vo Aquitanie
Verhürotet mit	Gisela

Läbe

Dr Charibert II. isch e Sohn vom fränkische König Chlothar II. gsi. Noch em Dod vo siim Vater 629/630 isch s Frankeriich nit wie s bis denn gängig gsi isch under de beide Söhn ufdeilt worde, sondern dr Dagobert I., dr elter vo beide, het s ganze Riich gerbt. Under em Druck vo neustrische Adlige agfüehrt vom Brodulf, siim Unggle müeterligersiits, het dr Charibert en Underkönigriich z Aquitanie übercho. Zu siim Riich hai d Stedt Toulouse, Cahors, Agen, Perigueux und Saintes ghört. Vo dört us het er mit Erfolg d Baske in dr Gascogne bekämpft.

Si Unggle Brodulf, won en understützt het, isch im Johr 630 bi dr Daufi vom Sigibert III., em Bueb vom Dagobert und dr Ragnetrude, drbi gsi und isch vom Dagobert z Saint-Jean-de-Losne im Burgund ermordet worde.

Si Dod und dr Dod vo siim Sohn Chilperich

Dr Charibert isch am 8. April 632 z Blaye gstorbe, me dänggt er siig vo siim Halbbrueder Dagobert ermordet worde. Churz noch siim Dod isch s Underkönigriich wider ufglöst worde, wil si Sohn Chilperich churz noch ihm gstorben isch. Dr Fredegar verzellt, ass er no as Buschi gstorbe siig. Er isch mögligerwiis vom Dagobert I. ermordet worde, so dass er Aquitanie wider wurd zruggübercho.

Dr Charibert II. isch in dr Chille St. Romain z Blaye an der Gironde begrabe worde.

• 
  D Daufi vom Sigibert III., wo im Charibert si Unggle Brodulf s Buschi über em Daufstei ghebt het
  (Us dr Chronik vom Guillaume Crétin, 16. Jh.)
• 
  S Frankeriich under em Dagobert I. und em Charibert II.

Literatur

• Dahn, Felix: Die Franken. Emil Vollmer Verlag 1899.
• Schneider, Reinhard: Königswahl und Königserhebung im Frühmittelalter. Anton Hirsemann Stuttgart 1972.
• Karl Ferdinand Werner: Die Ursprünge Frankreichs bis zum Jahr 1000. Deutscher Taschenbuch Verlag München 1995

Vorgänger Chlothar II.

König vo de Franke im Sonderriich Aquitanie 626 - 632

Nochfolger Chilperich von Aquitanien

Dä Artikel basiert uff ere fräie Übersetzig vum Artikel „Charibert_II.“ vu de dütsche Wikipedia. E Liste vu de Autore un Versione isch do z finde.