Hauptmenü ufmache

Dr Oberrhyynisch Rollwaage (dt. Der Oberrheinische Rollwagen) isch e Chuurzgschiichtewettbewäärb gsi, wu vu aafangs 1980er Joor bis anne 2005 uusglobt wooren isch.

GschiichtBearbeite

Iniziiiert woore isch där Lidraduurwettbewäärb anne 1981 vum Rudolf Stähle (1930-2005), wu bim Siiddytsche Rundfunk in dr Kultuurredakzioon z Charlsrue gschafft het.

Gnännt woore isch dr Wettbewäärb noch em „Rollwagenbüchlin“ vum Jörg Wickram, ere Sammlig vu Chuurzgschiicht us em 16. Joorhundert. Dr Wickram isch vu Colmar gsii un speeter Stadtschryybe z Burge woore, sy „Rollwagenbüchlin“ isch im 16.Jh. e grooße Erfolg gsii

In dr eerschte Joor het dr SDR dr „Oberrhyynisch Rollwaage“ zäme mit em TRIO-Magazin organisiert, speeter hän si in unterschiidlige Konschtellazioone au s di elsässisch Stadt St. Louis, d Basler Zytig un s Lidraduurhuus Baasel bi dr Organisazioon mitgmacht. Au no dr Fusioon vum SDR un em SWF zum Sidweschrundfunk het s SWR-Studio Charlsrue dr Rollwaage wyter organisiert, zum Dail zäme mit em SWR-Studio Fryyburg. Noch em Dood vum Stähle anne 2005 isch dr Bryys yygstellt woore.

Uusgschriibe woore isch där Wettbewäärb fir Autoorne un Autoore us em Elsass, dr Schwyz un vu Baade. S het all Joor e bstimmt Theema gee, z. B. 1994 „Nachbarn“, 2001 „Männergeschichten“, 2002 „Liebe“, 2003 „Kindergeschichten“, 2005 „Über Grenzen“. Mer het Gschiichte uf Dytsch, uf Franzeesisch un au im Dialäkt (uf Alemannisch, Siidfränkisch oder Pfälzisch) chenne yygee. D Gschiichte hän nit deerfe mee wie drei Din A4 Syte lang syy un hän au mieße uuvereffetligt syy. E Jury het derno us dr Yysändige di bremierte Gschiichte uusgweelt. Anne 2001 sin zem Byyschpel rund 230 Täxt yygee woore, anne 2002 rund 600. D Bryysverleijig isch als in verschiidene Stedt in dr Regioon gsii, z. B. z Charlsrue, z St. Louis oder z Burge.

S het als drei Bryys gee. Bryysdreeger sin under anderem d Rosemarie Bronikowski anne 1983 gsii, dr Markus Manfred Jung 1989, d Sophia Bauer 1990, dr Bernhard Lott anne 1995 (mit dr pfälzische Gschiicht „Rückkehr des Juden Joshua“), dr Martin Städeli 1996, dr Jonas Thorsten Krüger 1998, dr Jean-François Patricola („Lambeaux de rèves“) 2001, d Hilda Jauslin („Spaziergang, täglich“) 2002, d Inka Kleinke-Bialy 2003, d Carola Horstmann anne 2004 (mit dr alemannische Gschiicht „Moneli“) un dr Jens-Jörg Rieck 2005. Zue dr 20. Uusgaab anne 2002 isch au no en Jubileumsbryys vergee woore, an dr Wendelinus Wurth fir di alemannisch Gschiicht „Komm gib mir deine Hand“.

En Uuswaal vu Gschiichte us dr eerschte Joor isch anne 1987 unter em Titel „Rollwagenbuch“ usechuu.

LidraduurBearbeite

  • Rollwagenbuch. Auswahl aus den Kurzgeschichten-Wettbewerben „Oberrheinischer Rollwagen“ des SDR-Studios Karlsruhe und des. TRIO-Magazins. Zusammengestellt und herausgegeben von Rudolf Stähle und Norbert Paul Engel. Mit 4 Essays über Sprache u. Kurzgeschichte im Grenzland Deutschland, Frankreich, Schweiz von Hermann Ebeling. Engel, Kehl am Rhein / Strassburg / Arlington 1987. 216 S. Ill.. ISBN 3-88357-066-4
  • Hermann Fünfgeld: 70 Jahre Rundfunk in Baden : 1926 – 1996. Süddeutscher Rundfunk, Stuttgart 1996. 251 S. Ill. ISBN 3-922308-21-X kart. (Südfunk-Hefte 22)

WeblinkBearbeite