Die Mühle im Schwarzwäldertal
Die Mühle im Schwarzwäldertal isch a deitschr Hoimetfilm mit viil Dramadig vom Regisseur Hermann Kugelstadt us-em Johr 1953, dreht en Schwarz-Weiß. S erscht Mol ens Kino komma isch der Film am 18. Septembr 1953.
| Filmdate | |
|---|---|
| Originaltitel | Die Mühle im Schwarzwäldertal |
| Produktionsland | Deutschland |
| Originalsprooch | Deitsch |
| Erschiinigsjoor | 1953 |
| Lengi | 100 Minute |
| Altersfreigoob | FSK 12 |
| Stab | |
| Regie | Hermann Kugelstadt |
| Dräibuech | Johannes Kai, Hermann Kugelstadt |
| Produktion | Richard König |
| Muusig | Werner Bochmann |
| Kamera | Bruno Stephan |
| Schnitt | Luise Dreyer-Sachsenberg |
| Bsetzig | |
| |
| Dialäkt: Schwäbisch |
Handlong ändere
Eigentlich isch dr Philipp Kemper, wo e-ma idillischa Dal vom Schwarzwald a Mihle betreibt, a grondehrlichr Kerle, abr’r hot a grauß Laschtr. Emmr wiidr lôôt’r sich vom Hotelier Rapp zo-ma Kardaschbiil vorfihra, wo’s om grauße Geldbeträg goht. Do drbei schbiilt dr Rapp mit zenkde Karda, was dr oifäldig Philipp abr et merkt. Uf dui Weis hot dr Rapp scho an Haufa Schuldvorschreibonga uf da Kemperscha Familiabsitz griagt.
Em Philipp sei jengrer Bruadr Paul kommt noch langr Kriagsgfangaschaft en d Hoimet zruck. En dr Mihle trifft’r uf d Gertrud, wo vor a baar Johr vo seira Muadr als Flichtlengs-Woisakend ufgnomma worra ischt ond jetzt als Hausdochtr d kaufmennische Gschäft erledigt. Dr Paul ond d Gertrud kommet sich bald näher. Schliaßlich nemmet se sich vor, en Belde mitnandr vôr da Altar zo tredda. Noch dr Hauzich dät dr Paul gern uf seira Bsitzhälfde a Tankstell mit ma Raschthaus baua. Mit deane Plee isch’s abr bald aus, wia dr Paul erfehrt, dass sei Bruadr an graußa Doil vom Grond ond Boda vorschbiilt hot. So kommt’s zo-ma Riisakrach zwischa deane Briadr. Dô druf helt’s da Paule nemme drhoim aus ond’r haut ab. D Gertrud abr bleibt e dr Mihle, om deam labila Philipp Kraft ond Halt gäa zo kenna, zomol-ra der vorschbrocha hot, dass’r sich bessra dät. Seine hartneggige Heirats-Ôôträg abr lehnt se ab. Wia nôô abr emmr ärgr d Muadr Kemper uf se neischwätzt, se soll doch da Philipp heirada, geit se schliaßlich nôch.
Kaum ischt d Gertrud em Philipp sei Weib, lôôt sich der wiidr vom Rapp zo ma Glickschbiil vorfihra. Dr ald Familiabsitz ischt ernschthaft gfährdet. Drom telegrafiirt d Muadr Kemper em Paul, er soll hoimkomma ond-ra helfa.
Wiidr amol sitzt dr Philipp mit-em Rapp beim Kardaschbiil ond vorliirt dô drbei vollends de ganz Mihle. Wia-nr wiidr alloi ischt, sauft’r sich oin ôô. E dr Nacht kommt dr Rapp ond will d Mihle ôôgugga. Dô drbei brengt’r mit seim Gschwätz da Philipp zor Weißgluat. Wia nô au no dr Rapp s Mahlwerk en Bewegong brengt, langet dr Philipp noch-ra Brechstang ond schmeißt se ens Mahlwerk. Om dean tobsichtiga Kerla drô zo hendra, ällas vollends ganz hee-zmachet, wirft sich dr Rapp em Philipp entgega.
Des Geraddr en dr Mihle weckt d Gertrud ond dean vo ihrer Schwiigrmuadr zruckgruafena Paul auf. Mitnandr ganget se naa en Mahlroom. Deet miasset se entsetzt mit ôôgugga, wia dr Rapp da Philipp gega ois vo de grauße Schwongreder wirft. E-ma Hui schbrengt des Schwongrad aus seim Lagr ond vorgrabt dia zwoi Manna ondr sich. Solang dr Rapp da letschda Schnaufr duat, kô dr Philipp grad noh sein Bruadr om Vorzeihong bidda ond em erklära, dass d Gertrud ehn bloß uf Wonsch vo dr Muadr gheiradet, ihr Herz abr emmr bloß ehm golda häb.
Der Film heert uf, wia dr nägschde Dag ôôbricht ond d Gertrud mit-em Paul langsam aus dr Mihle kommet. E dr letschda Eistellong legt dr Paul sein Arm om d Schuldr vo dr Gertrud ond zuit se langsam zo sich her.
Kritik ändere
- S Lexikon des internationalen Films (Bd. 5 en dr Ausgab vo 1988) moint, der Film wär a lendlichs Nôchkriagsdrama ohne dia Landschafts-Show-Effekt, wia ma se sonscht vo de Hoimatfilm her gwohnt ischt.
Litradur ändere
S Programm zom Film (Illustrierte Film-Bühne, Nr. 2069)