Dieter de Lazzer

Dialäkt: Schwäbisch

Dr Dieter de Lazzer (* 1941 z Hoidna) ischt an deitscher Krimiautor, evangelischer Theolog ond Rechtsôwalt.

Aus seim Leaba

Dr Dieter de Lazzer ischt 1941 z Hoidna uf d Welt komma. An Doil vo seine Vorfahra stammed us Sidtirol ond send Ladiner gwäa. Vo dôher kommt au sei Nôchnama, wo en Deitschland doch arg selda ischt. Nôch-em Abi hot’r Theologii ond Rechtswissaschafda studiirt. Wia-nr dô drmit ferdich gwäa ischt, hot’r zerscht amôl a baar Johr en-ra Pfarrei en Schottland gschafft ond hendrher Forschongs- ond Lehrtädigkeida sowohl z Deitschland wia au em Ausland ausgiabt. Schbätr isch’r hauptsächlich als Rechtsôwalt tädig gwäa. Sei Schbezialideet send dô drbei d Prozess vôr de Vorwaldongsgricht ond vôr-em Vorwaldongsgrichtshof en Mannheim gwäa. Er hot au mehrere jurischdische Schrifda vorfasst.

A Freind vom Dieter de Lazzer ischt dr schwäbische Autor Felix Huby, wo vor ällem fir seine Krimis – Biacher ond Film – bekannt worra ischt. Zamma mit sellem hot’r a baar Seria firs Fernseh ond au Theatrstick gschriiba, wo oft em schwäbischa Schbrôchroom ôgsidlet gwäa send.

Dr Dieter de Lazzer ischt vrheiradet mit dr evangelischa Dekanin Dr. Marie-Luise Kling-de Lazzer vo Diibenga. An dr Staatlicha Hochschual fir Gschdaldong z Karlsrua isch’r dr Vorsitzende vom Hochschualrat.

A baar vo seine Werk, wo-nr mit-em Huby zamma vorfasst hot

Fernsehseria

• 1988: Oh Gott, Herr Pfarrer (a 13-doiliga Familiaserie mit-ma starka schwäbischa Eischlag)
• 1990 bis 1991: Pfarrerin Lenau (nomôl a Familiaserie en 13 Doil, desmôl om a Pfarrere emma Stadtdoil vo Stuegert)

Theaterstick

• 2006: Selbscht ischt dr Mann (z’erscht Môl uf d Bihne komma am 29. Septembr 2006 en dr Komödie im Marquardt z Stuegert)
• 2008: Georg Elser – Allein gegen Hitler (a Volksstick, z’erscht Môl ufgfihrt am 28. Februar 2008 am Theater Lindenhof z Melchenga)