Dietmar Woidke

Dr Hubert Dietmar Woidke (* 22. Oktober 1961 z Naundorf) isch e dytsche Bolitiker (SPD). Är isch syt Augschte 2013 dr dritt Minischterbresidänt vum Land Brandenburg.

dr Dietmar Woidke (2017)

Härchumft, Studium, un Privats

Dr Woidke isch in dr Zyt vu dr DDR mit eme Brueder uf eme Buurehof im Krais Forst in dr Niderlausitz ufgwagse, wu syt Jorhunderte im Familiebsitz isch. Sy Vater isch Schlosser un sy Mueter Hauptbuechhalteri vun ere Landwirtschaftlige Brodukzionsgsosseschaft (LPG) gsii. Noch em Abitur 1980 un em achtzehmonetige Grundwehrdienscht bi dr Nazionale Volksarmee z Cottbus het dr Woidke ab 1982 Landwirtschaft un Dierprodukzion/Ernehrigsphysiologi z Oscht-Berlin an dr Humboldt-Uniwersitet studiert. Dert het er anne 1987 s Studium as Diplomagraringenieur abgschlosse un isch bis 1990 wisseschaftlige Assischtänt am Inschtitut fir Ernehrigsphysiologi gsii. Vu 1990 bis 1992 het dr Woidke di wisseschaftlig Abdailig vum Mineralfueter-Härsteller SANO-Mineralfutter GmbH glaitet. Är isch vu 1992 bis 1993 Amtslaiter fir Umwält un Landwirtschaft vum Landkrais Forst, no dr brandenburgische Kraisreform derno bis zue syre Wahl in Landdag Brandenburg 1994 Amtslaiter fir Landwirtschaft im Landkrais Spree-Neiße gsii. Anne 1993 isch er an dr Humboldt-Uniwersitet z Berlin mit ere Dissertazion zum Thema Laboruntersuchungen zur Strohkonservierung mittels Harnstoff-Saccharose-Zusatz und zum Trockensubstanzabbau der Konservate nach der Nylonbeutel-Methodik bromewiert wore. 2006 het dr Woidke d Jegerbreifig zum dytsche Jagdschyy ab glait.

Dr Woidke isch Mitglid vu dr Evangelische Chilche Berlin-Brandenburg-schlesischi Oberlausitz. Är isch in zwoter Eh mit dr Susanne Woidke ghyrote. Si hän baidi us ire erschte Ehe ne Dochter un wohne z Forst (Lausitz).

SPD-Bolitiker syt 1993

dr Dietmar Woidke im Landdag Brandenburg (2020)

Anne 1993 isch dr Woidke as 32-jehrige Amtslaiter in d SPD yydrätte, wun er bi dr Landdagswahl Brandenburg 1994 e Diräktmandat derfir gwunne het. Sy Wahlkrais isch Spree-Neiße II gsii, wun er au 1999 diräkt gunne het. Wun er 2004 s Diräktmandat nimi het chenne gwinne, un in Landdag iber d Landeslischt yyzogen isch, isch er Landdagswahl 2009 im Wahlkrais Spree-Neiße I aadrätte un het dert diräkt gwunne. Bi dr Landtagswahl 2014 het er dr Wahlkrais wider diräkt mit 49,5 Brozänt vu dr Stimme wunne. 2019 het er wider s Diräktmandat gwunne, des Mol mit 36,2 Brozänt vu dr Stimme.

Im Landdag isch er vu 1994 bis 1999 stellverdrättende Vorsitzer vum Uusschuss fir Ernehrig, Landwirtschaft un Forscht un vu 1999 bis 2004 Mitglid vum Uuschuss fir Landwirtschaft, Umwältschutz un Ruumornig gsii. Zytwys het er dr Bruunchohlenuusschuss vum Land Brandenburg glaitet. Wun er 2009 nit in s Landeskabinett chuu isch, het er vu Novämber 2009 bis zue syre Beruefig as Inneminischter im Oktober 2010 s Amt vum Frakzionsvorsitzer vu dr SPD-Frakzion ghaa un isch Mitglid vum Bresidium vum Landdag gsii. Vu Dezämber 2009 bis Novämber 2010 isch er derzue au Vorsitzer vum Hauptuusschuss vum Barlemänt.

Vu 1998 bis 2003 isch er au Stadtverordnete z Forst (Lausitz) gsii un het vu 1998 bis zue syre Ernännig zum Minischter im Johr 2004 em Kraisdag vum Landkrais Spree-Neiße aaghert. Bi dr Kommunalwahl anne 2008 isch dr Woidke wider as Stadtverordnete in d Stadtverordneteversammlig vu Forst (Lausitz) un as Abgordnete in Kraisdag Spree-Neiße gwehlt wore. Die Mandat het er im Oktober 2010 im Zämmehang vu syre Ernännig zum Inneminischter vum Land Brandenburg zruggdrätte.

Am 26. Augschte 2013 isch dr Woidke as Noofolger vum Matthias Platzeck zum Vorsitzer vum SPD-Landesverband Brandenburg gwehlt wore. Uf em ordelige Barteidag vu dr SPD vum 14. bis 16. Novämber 2013 z Leipzig isch dr Woidke as Bysitzer in Bundesvorstand vu dr SPD gwehlt wore.

Landesminischter z Brandenburg (2004 bis 2009, 2010 bis 2013)

Vum 13. Oktober 2004 bis 21. Oktober 2009 isch dr Woidke Minischter fir Ländligi Entwicklig, Umwält- un Verbruucherschutz im Land Brandenburg gsii. No dr Landdagswahl 2009 isch er fir kai Regierigsposchten me vorgsää gsii go d Frauequote im Kabinett hecher mache.

Noch em Ruggdritt vum Inneminischter Rainer Speer am 23. Septämber 2010 het dr Minischterbresidänt Matthias Platzeck am 6. Oktober 2010 dr Woidke zue sällem sym Nooflger ernännt. Neie SPD-Frakzionsschef isch dr Ralf Holzschuher wore. As Inneminischter het dr Woidke d Verwaltigsmodernisierig im Land Brandenburg firschidribe. In däre Funktzio isch er noch em Tarifverdrag iber Maßnahme zur Beglaitig vum Umböu vu dr Landesverwaltig Brandenburg (TV Umbau) Vorsitzer vum Byrot gsii.

Ais vu dr greschte Reformvorhaa, wu dr Woidke as Inneminischter derfir zueständig gsii isch, isch dr Bolizeireform z Brandenburg gsii. Si het druf abziilt, dr Personalbstand in dr brandenburgische Bolizei vu ca. 8800 anne 2010 uf 7000 bis aafangs 2020 z reduziere. Bis dert het Brandenburg zwai Bolizeibresidie, ai Landeskriminalamt un ai Landesyysatzainhait (LESE) ghaa. Am 16. Dezämber 2010 het dr brandenburgisch Landdag em Gsetzentwurf zum Bindele vu däne Beherde imn aim neie Bolizeibresidium zum 1. Jänner 2011 zuegstimmt.

Minischterbresidänt vu Brandenburg (ab 2013)

dr Dietmar Woidke as Bundesrotsbresidänt (2019)

Noch em Ruggdritt vum Matthias Platzeck isch dr Woidke am 28. Augschte 2013 zum dritte Minischterbresidänt vu Brandenburg gwehlt wore. Är isch vum 1. Novämber 2018 bis zum 31. Oktober 2019 turnusmäßig zweete Vizebresidänt vum Bundesrot un druf bis zum 31. Oktober 2020 Bresidänt vum Bundesrot gsii, voreb er derno erschte Vizebresidänt woren isch.

Am 3. Mai 2014 isch er fir d Landdagswahl z Brandenburg 2014 zum Spitzekandidat vu syre Bartei gwehlt wore. Bi dr Wahl het dd SPD iri Stellig as sterkschti Chraft chenne verrdaidige un isch uf 31,9 Brozänt vu dr Stimme chuu (-1,1). D SPD het d Wahl ghaa wzisch ere Furtsetzig vu dr Kolaizion mit dr Linksbartei (18,9 Brozänt vu dr Stimme) un ere Koalizion mit dr CDU (23 Brozänt vu dr Stimme). D SPD un dr Woidke häön si schließlig entschlosse mit dr rot-rote Kolazion wyterzmache. Am 5. Novämber 2014 isch dr Woidke vum Landdag mit dr 47 Stimme vu dr Koalizion im Amt bstetigt wore.

Bi dr Landdagswahl z Brandenburg 2019 isch d SPD sterkschti Bartei vor dr AfD wore. D SPD het Koalizionsverhandliuge mit dr CDU un dr Griene gfiert, am 20. Novämber 2019 isch dr Wodike im Landdag as Minischterbresidänt mitr dr Stimme vu dr SPD, dr CDU un dr Griene widergwehlt wore (47 zue 37 Stimme, bi drei Enthaltige).

Bi dr Landdagswahl z Brandenburg 2024 isch d SPD wider sterkschti Bartei vor dr AfD wore.

Literatur

• Dietmar Woidke, Internationales Biographisches Archiv 32/2013 vom 6. August 2013, im Munzinger-Archiv (Artikelaafang frei abruefbar)

Weblink

 Commons: Dietmar Woidke – Sammlig vo Multimediadateie

• Literatur vu un iber Dietmar Woidke im Katalog vu dr Dütsche Nazionalbibliothek
• Biografi bim Landdag Brandenburg
• Parlamentsdokumentation Brandenburg
• Biografi bi dr brandenburgischen Landeszäntral fir bolitischi Bildig
• Annett Meiritz: Platzeck-Nachfolger Dietmar Woidke: Dr. Sachlich übernimmt. Spiegel Online, 29. Juli 2013.

Fueßnote

Dä Artikel basiert uff ere fräie Übersetzig vu dere Version vum Artikel „Dietmar_Woidke“ vu de dütsche Wikipedia. E Liste vu de Autore un Versione isch do z finde.