Else Wittum
D Elsa „Else“ Wittum (* 30. Mai 1927 z Hohenegg as Elsa Schlageter; 16. Meerz 2022 uf em Holl-Buck) isch e dytschi Haimetdiichteri gsii.
Lääbe
ändereD Wittum isch mit drei Brieder z Hohenegg ufgwagse. Si isch z Ried uf d Volksschuel gange. Wel iri Mueter chrank wooren isch un iri Brieder hän mieße Wehrdienscht laischte, het si scho frie uf em Buurehoof vu dr Eltere mieße uushälfe.
Iber d Aktion „Brieffryndschafte“, wu d NS-Machthaaber Kontakt zwische junge Fraue un Soldaate hän welle feerdere, het si ire speetere Mann Karl Wittum (1925-2014) vu Memmenge chännegleert. Noch em Chrieg isch er zuen ere ins Chlai Wiisedaal chuu, im Mai 1951 hän si in dr Chilche z Dägernau ghyroote. Aafangs het s jung Baar uf em Hoof vu ire Eltere z Hohenegg gläbt. Anne 1966 hän s Wittums e Buurehoof uf em Holl-Buck chenne chaufe, wu si zäme buurt hän. Si hän fimf Chinder ghaa, vier Maidli un e Bue.
D Else Wittum het gärn gsunge un Gediicht uf Alemannisch gschriibe. Si isch Mitgliid im Elbeschwander Choor gsii un het mit ire Fryndin Erna Lenz as Gsangsduo „d´ Erna und d´ Els“ iber 100 Ufdritt im Chlaine Wiisedaal, im Chanderdaal un im Maarkgreeflerland ghaa. Si hän Lieder gsunge un Sketsch ufgfiert. Anne 1997 isch d Else Wittum vum Gsangverain Ried zum Ehremitgliid ernännt woore. En Uuswahl us íre Gediicht het si 1995 un 2000 in zwai Biechli uusegee.
Am 16. Merz 2022 het d Else Wittum iri Auge fir immer zuegmacht, rund aacht Johr no irem Mann.
Wäärch
ändere- Eifach un schlicht, no fallt's nit ins Gwicht. Heiteres und Besinnliches. Druckerei Jakobs, Holl-Buck 1995
- Vom Bruchtum unn das unn säll. Druckerei Jakobs, Holl-Buck 2000
Weblink
ändere- Ralph Lacher: Die Kleinwiesentäler Mundartdichterin Else Wittum ist gestorben, Badische Zeitung, 21. Meerz 2022
- Kleines Wiesental Mundarttalent mit Liebe zum Kleinen Wiesental , Markgräfler Tagblatt, 19. Meerz 2022
- Kleines Wiesental Gesang und Dichtung geben ihr Kraft, Markgräfler Tagblatt, 29. Mai 2017