Emanuel Erlacher
| Dialäkt: Baselbieterdütsch |
Dr Emanuel Erlacher (*13. Merz 1878 z Béziers, † 5. Februar 1952 z Baasel) isch e Schwizer Archidekt gsi.
Dr Erlacher isch 1878 z Béziers in Frankriich uf d Wält cho. Er isch z Baasel uf d Schuel und het vo 1893 bis 1896 e Leer bi de Brüeder Kelterborn gmacht. Bis 1901 het er bi verschiidene Firme z Baasel und in Dütschland gschafft. Denn het er an dr Technische Hoochschuel z Karlsrue bim Carl Schäfer, Friedrich Ratzel und Max Laeuger studiert. Vo 1902 bis 1904 isch er dr Schef vom ene Archidekturbüro z Freiburg im Brisgau gsi. 1904-1905 het er as Assistänt vom Brofässer Paul Bonatz gschafft und isch e Schüeler vo de Brofässer Theodor Fischer und Gustav Halmhuber z Stuttgart gsi. 1906 het er sich sälbständig gmacht und im Joor druf mit em Alfred Widmer zur Firma Widmer und Erlacher zämmegschlosse. 1952 isch dr Emanuel Erlacher z Baasel gstorbe.