De Euphemos (Εὔφημος; dorisch: Euphāmos) isch i de griechische Mythologii en Argonaut und de Stammvatter vo de Battiade, wo König öber Kyrene gsii sind. Er und sini Noofaare sind Füerer vo de Minyer gsii.

De Euphemos isch de Soo vom Poseidon und vo de Mekionike. Er hett a de Argonautefaart tailgnoo und chöne öbers Wasser lauffe. Verhürootet isch er mit de Laonome gsii, ennere Schwöster vom Herakles.

Bim Pindar isch de Euphamos de Soo vom Poseidon und vo de Europa, e Töchter vom Tityos. Er isch am Vorpirg Tainaron uufgwachse und ann vo de Argonaute gsii. Uf de Irrfart vo de Argo sind die z Libye glandet bim Tritonische See. Dai het de Eurypylos, en andere Soo vom Poseidon, em Euphamos en Erdchlumpe ggee und gsait, as sini Noofaare i de vierte Generation Libye bisidle werid. De Erdchlumpe isch aber uf de Faart vom Schiff und is Meer ghait und drus use isch d Insle Thera entstande. D Medeia het drufabe prophetisch verchündt, as wege dem Verlust sini Noofaare erst i de sibezeete Generation Libye bisidle werid.

Noch de Argonautefaart loot sich de Euphamos mit anderne Argonaute uf de Insle Lemnos nider, wo d Fraue all eri Mane ermordet ghaa hend und züügt mit de Lamache e Soo. I de vierte Generation hend sich d Minyer vo Lemnos under de Füerig vom Sasamos em Theras aagschlosse und d Insle Thera bisidlet. Ane 631 v. Chr. hett de Battos, wo i de sibezeete Generatio vom Euphamos abstammt, d Stadt Kyrene z Libye gründet und isch de ersti kyrenischi König gsii.

Quelle ändere

  • Pindar: Pythischi Ode 4.43ff.
  • Herodot: 4.179 ??
  • Apoll. Rhod. 4.1537ff.

Literatur ändere

Paul Dräger: Euphemos. In: Der Neue Pauly (DNP). Metzler, Stuttgart 1996–2003, ISBN 3-476-01470-3.