Europa

D Europa (altgriech. Εὐρώπη, Eurṓpē) isch ä Gschdalt us dr griechische Mythologii. Si isch d Tochter vom phönizische König Agenor odr vom Phoinix gsii und isch vom Zeus entfüert worde und uf de Insle Kreta d Muetter vom Minos worde. Noch ire isch de Erdtail Europa gnennt und au de Jupitermoo Europa.

d Europa wo vom Stier entfüert werd. Gmäld vom Tizian (1477-1576)

Saag

D Europa isch e Königstochter gsii, as Vatter werd entweder de Agenor oder de Phoinix agee und au för iri Muetter sind meriri Näme öberliferet. Iri Haimet isch Phönizie gsii, je noch Öberliferig entweder d Stadt Tyros oder Sidon. Wo si mit sinene Fründine am Meerufer miteme Böle gspilt het, isch en prächtige wiisse Stier erschine. D Maitli hend Angst öbercho, aber wo si gemrkt hend, as de Stier ganz zoom isch, hend s en afange straichele und sind em Schluss sogär ufem gritte. Wo aber d Europa uf de Stier ghocket isch, isch de i aim Garacho losgrennt und direkt is Meer ine. Er isch denn öbers Meer gschwume und uf de griechische Insle Kreta glandet.

Dai het sich de Stier in en Maa verwandlet und de het gsait, as er de Gott Zeus sai. Er het mit er gschlofe und so sind drai Chind uf d Welt cho, de Minos, de Rhadamanthys und de Sarpedon. Demit ere nünt passieri, het si vom Zeus en Wächter öbercho, de Bronzeriis Talos. D Europa het denn de kretischi König Asterios ghüroote. Noch dem sim Tood isch denn de Minos de König vo Kreta wore.

Ire Vatter isch zimli hässig gsii, woner ghört het, ass sini Tochter entfüert wore sai. Er het all sini Söö usgschickt um d Schwöster go sueche, und het ene aagroote, jo nöd oni ere haizchere. De Kadmos isch denn uf Griecheland cho, isch aber döt blibe und het d Stadt Thebe gründet.

Kult

D Europa isch uf Kreta bide Stadt Gortyn verehrt worde und me het um si z Eere jedes Joor s Fescht vo de "Hellotia" gfiiret. D Münze vo Gortyn zaiget denn au d Europa ufem Stier.

I de Römerzit isch Europa i de phönizische Stadt Sidon au as Biname vo de Göttin Astarte brucht worde.

S Sternbild Stier söll a die Saag erinnere.

Anderi Persone

En anderi Europa isch d Tochter vom Tityos gsii und si het mitem Poseidon en Soo ghaa, de Argonaut Euphemos.

E dritti Europa isch de Name vonere d Tochter vom Okeanos und de Tethys gsii.

Büecher

• Edward Tripp (ÜS: Rainer Rauthe): Reclams Lexikon der antiken Mythologie; Stuttgart 1991. ISBN 3-15-010371-1
• Ruth E. Harded: Europe (2). In: Der Neue Pauly (DNP). Band 4, Metzler, Stuttgart 1998, ISBN 3-476-01474-6, Sp. 293–294.