S Exarchat im früebyzantinische Riich

S Exarchat isch e byzantinische Verwaltigsdistrikt gsi, wo vom ene Exarch gläitet worde isch. In vile Hiissichte isch es e Vorstuefe vo de spöötere Theme gsi.

Exarch (griech. äigentl. „Vorgsetzte“) isch in dr früebyzantinische Zit dr Ditel vo de Statthalter vo de afrikanische (Exarchat vo Karthago) und italische (Exarchat vo Ravenna) Bsitz vom Oströmische bzw. Byzantinische Riich gsi. In sim Verwaltigsberiich het dr Exarch die obersti milidäärischi und zivili Gwalt usgüebt. Wo mä die bäide Kompetänze in äi Hand gee het, het mä mit dr spootrömische Braxis vo dr klare Drennig vo de bäide Beriich broche, wo sit öbbe 300 Joor üüblig gsi isch. Dr Kaiser Maurikios (582–602) het d Exarchat iigfüert, zum s de Regänte vo de Ussegebiet liichter z mache, die gege Aagriff vo Usse z verdäidige.

D Exarchat si im Früemiddelalter verschwunde, wo die byzantinisch Herrschaft im Weste zämmebroche isch: 697/98 isch Karthago an d Araber gfalle, und 751 häi d Langobarde Ravenna eroberet.

Liddratuur

• J. Ferluga: Exarch/Exarchat. In: Lexikon des Mittelalters. Bd. 4, Sp. 151–155.
• M. Meier: Exarchat. In: Der Neue Pauly. Bd. 4, Sp. 331-332.

Dä Artikel basiert uff ere fräie Übersetzig vum Artikel „Exarchat_(Byzantinisches_Reich)“ vu de dütsche Wikipedia. E Liste vu de Autore un Versione isch do z finde.