Koordinate: 47° 34′ 1″ N, 7° 36′ 27″ O; CH1903: 612709 / 268484

Dialäkt: Baseldütsch

S Förnbacher Theater isch e Theater gsi, wo im Badische Bahnhof z Basel dehäi gsi isch. Hüt isch s e Theaterkompanii ooni äignigs Huus, d «Helmut Förnbacher Theater Company», wo immer no vom Helmut Förnbacher gläitet wird.[1]

Gschicht ändere

1980 het dr Basler Schauspiiler und Reschissör Helmut Förnbacher si freiji Theatergrubbe, d «Helmut Förnbacher Theater Company», gründet. Lang häi si käi Häimbühni gha, hai äi Inszenierig pro Säson ufgfüehrt in dr Stadt Basel sälber oder dr Umgäbig. 1980 isch s in dr Elisabethekiirche gsi, wo si im Hugo vo Hoffmannsthal si «Jedermann» gee hai und im neggste Johr «Das grosse Welttheater» in dr Martinskiirche. In de Johr druf si si vom Botanische Garde Brüglige uf Rieche in Sarasin- und in Wänkepark zooge, hai au im Volkshuus, Pfisterhuus und in dr Mäss Basel ufgfüehrt, bis si 1997 im Badische Bahnhof, im Büffe, glandet si. Vo 1998 bis 2021 het iir Theater dört Förnbacher Theater ghäisse und isch in dr ehemolige Zollhalle dehäi gsi. Hüt isch s wider e Theaterkompanii ooni äignigs Huus.[2]

Brogramm ändere

Solang si no käi äignigs Theater gha het, het d Company en äinzigs Stück in dr Säson inszeniert. Im Badische Bahnhof isch s Brogramm rasch gwaggse und in 2011/12 het s säggs Nöibroduktione und zäh Wiiderufnohme in meh as hundertsibzig Vorstellige gee.

Im Repertuar het s vil Klassischs: Shakespeare, Goldoni, Molière, Goethe, aber au modärneri Klassiker wie dr Jean Anouilh, dr Oscar Wilde oder dr Arthur Schnitzler chömme nid z churz, und immer wider gseet mä im Dürrematt siini Stück. Sid 1999 wird au jedes Johr s vorfasnächtlige «Ridicule» ufgfüehrt. Für Chinder gits mänggisch Mundartvorstellige am Sunndig am Noomiddag, und au die Erwaggsene hai mit «Altwyyber-Friehlig», dr Bühneadapdierig vom Film «Die Herbstzeitlosen», e Dialäktmümpfeli überchoo.

Finanziells ändere

Wie bi de mäiste brofessionelle Theater länge au bim Förnbacher d Iinahme vom Billettverchauf nid. S Theater wird nid staatlig subventionert, bechunnt aber mänggisch vom Baasler Regierigsroot e finanzielli Understützig für e bestimmti Broduktion, wenn s drum bittet. Au dr Kanton Basel-Landschaft, Gmäinde, Stifdige und Sponsore hälfe mit Fördergälder us und dr Förnbacher sälber investiert in s Theater vom Gäld, won er für d Färnsehfilm überchunnt, won er macht.

Quelle ändere

Fuessnoote ändere

  1. https://foernbacher.ch/?splash=0 D Website vo dr Helmut Förnbacher Theater Company], aagluegt 10/10/2022
  2. Website vo Telebasel: Vorhang im Förnbacher Theater fällt zum letzten Mal, 11.08.2021. aagluegt 10/10/2022