In Urkunde chunnt si zum erste Mol 1101/03 vo. Die undere Däil vom Durm und Däile vo dr Westfassade si im Joor 1287 baut worde. S Chorpolygon und d Nord- und d Südfassade sin in iire Grundzüüg ins spoote 14. Joorhundert datiert. 1529 het do dr Johannes Oekolampad, dr Reformator vo Baasel, zum erste Mol uf «reformierti Art» breediget, und das ud Dütsch.
1851 isch d Kiirche witgehend renowiert und umbaut worde. Mä het d Fassade erheblig umgstaltet und im Innere het mä am Blatz vom Lettner e Konzärtbüüni baut. Scho denn isch d Martinskiirche as Konzärtkiirche und für verschiideni staatligi Veraastaltige brucht worde. Zum e Warmlufthäizig z installiere het mä 1892 under em Chor e Chäller baut. Über em Südportal isch sit 1922 dr Häiligi Martin im ene Wandbild vom Hans Rohner abbildet. S Innere vo dr Kiirche isch mit e Hufe Epitafe usgstattet.
Noch dr Dradizioon isch s e Glogge vo dr Martinskiirche, wo jeedes Joor dr Aafang vo dr Baasler Herbstmäss iilütet.
