Fliäli-Ramft

S Fliäli (oi Fliäli-Ramft) isch än Oord im Kanton Obwaldä und gheerd zur Gmäind Sachslä. Wills guäd zwäihundert Meter heecher liid als ds Dorf Sachslä, hend friäner d Liit vom Dorf dänä vom Fliäli oi d Bärger gsäid.

Dr Orts-Chärn vom Fliäli gilt als «Ortsbild vo nazionaler Bediitig».

Bekannt isch s Fliäli vor allem wäg em Bruäder Chlois, wo hiä 1417 uf d Wäld cho isch, hiä gläbd hed und sich 1467 als Äinsidler i d Melchaaschlucht, i Roift (niiwer oi z Obwaldä Ramft oder Ranft), zruggzogä hed. Gschtorbä isch är 1487. Sis Grab isch z Sachslä unnä, s Fliäli und dr Roift sind aber wichtigi Pilgerschtett. D Zälle, wo im d Obwaldner Regiärig 1468 hed la buiwä, cha mä bsuächä.

Äs markants Gebiiw im Fliäli isch s Hotäll «Paxmontana» (churz äifach oi «s Pax», wo 1896 als Nobelhotäll und Kuirhuis «Ninalphorn» ereffned wordän isch.

• 
  D Fliäli-Chappälä isch uf ämä Felsä obä
• 
  Diä ober Roiftchappälä mit der Zällä vom Bruäder Chlois
• 
  S Hotäll «Paxmontana» vo hinnä
• 
  S Huis «z Fliä»

Weblink

 Commons: Flüeli-Ranft – Sammlig vo Multimediadateie

• Dorfverein Freunde Flüeli-Ranft mit Informazione zum Ort
• Sachseln · Flüeli-Ranft · Älggi-Alp d Website vo Obwalden Tourismus uf flueliranft.ch