Flugzüügkollision i der Luft

Dialäkt: Bärndütsch

E Flugzüügkollision i der Luft (änglisch: mid-air collision) isch e Flugunfall, wo nes Flugzüüg mit em ne andere Flugzüüg I der Luft zämestosst. So ne Kollision füehrt praktisch immer zum Absturz vo eim beteiligte Flugzüüg. Es chunnt aber nid sälte vor, das grad beidi Flugzüüg Abstürze. E Zämestoss i der Luft, gilt i der Luftfahrt als eis vo de schlimmste Unfallereigniss wo’s git, da bim Verluscht vo beidne Flugzüüg e gwaltigi Azahl a Todesopfer z bechlage sy. D Wahrschinlechkeit das es bi so mene Unglück überläbendi git isch sehr chly.

D beinahe Kollision

We sech di beide Flugzüüg no rächtzytig gseh, isch es de meischte Pilote no müglech uszwyche. D Manöver wo d Pilote i so mene Fall müesse flüüge sy relativ heftig u sy ou i der Passagierkabine spürbar. So Uswychmanöver glinge allerdings nur bi gueter Sicht u gnüegender Reaktionszyt für beidi Pilote.

Der Grund für ne Flugzüügkollision

D Gründ für ne Flugzüügkollision i der Luft chöi Underschidlech sy.

Fähler vo de Pilote
Fähler bi de Lotse
Fählerhafti Vorschrifte
Schlächti Sicht
Transponder nid aktiv

Ds TCAS

D Azeig vom TCAS.

I de 1950er Jahre het’s e ganzi Reihe vo Zämmestöss i der Luft gä. Drum het me ab 1956 ds Traffic Alert and Collision Avoidance System entwicklet. Ds TCAS stellt mit hilf vom Transponder d Position vom Flugzüüg fescht u we sech zwöi Flugzüüg z naach chöme, de kommuniziere di beide System mitenand u gäbe wenn nötig Awysige zum ne Uswychmanöver. Ändi de 1980er Jahr het me das System z erscht mal i der USA ygfüehrt. In zwüsche isch ds TCAS uf der ganze Wält im Ysatz u het einigi Kollisione i der Luft verhinderet. Es chunnt allerdings hüt no zu Kollisione i der Luft.

Flugzüügkollisione i der Luft

Weblink

Commons: Mid-air collisions – Sammlig vo Multimediadateie

Studie über Annäherungen und Kollisionen von Luftfahrzeugen im deutschen Luftraum 2010-2015 (PDF, 1 MB)