Friedrich I. vu Bade

Dialäkt: Undermarkgreflerisch

Dr Markgrof Friedrich I. vu Bade (* um 1249 z Alland/Nidereschtryych; † 29. Oktober 1268 z Neapel) isch vu 1250 bis 1268 dr regiered Markgrof vu Verona un Bade gsi, derzue Herzog vu Eschtryych.

Läbe

Dr Hermann Friedrich I. isch dr Suhn vum Hermann VI. vu Bade un dr Gertrud vu Babenberg gsi, dr Nichte vum Herzog Friedrich em Strytbare vu Eschtryych, em letschte Herrscher us em Huus vu dr Babenberger.

Syy Vater Hermann vu Bade het im Namme vu syyre Frau Aaspruch ghobe uf Eschryych, het syy Aaspruch uf d Noofolg aber nit chenne dursetze. No syym Dod het dr Friedrich mieße flichte vor em Chenig Ottokar Přemysl vu Behme, wu Eschtryych anne 1251 ohni Widerstand het chenne bsetze. Dr Friedrich het derno zerscht in dr Steiermark gläbt, derno bi syym Schwoger Ulrich III. vu Kärnten, syt 1266 aber z Bayern, wun er si aagfryndet het mit em Konradin vu Hochestaufe. Anne 1267 het er sich eme Italiefäldzug vum Konradin aagschlosse, wu dää uuszoge isch go s staufisch Erb zruckerobere.

Zämme mit syym Frynd Konradin, wu sich as Chenig vu Jerusalem un Sizilie gsähne het, isch dr Friedrich I. vu Bade gege Sizilie zoge. Dr Papscht het dr Konradin nume as Hwerzog vu Schwobe gsähne un Chenig vu Jerusalem un het derfir dr Karl vu Anjou, dr Brueder vum Ludwig IX. vu Frankryych, zum Chenig vu Sizilie gmacht. Anne 1267 sin dr Konradin un dr Friedrich I. mit eme chleine Heer geg dr Karl vu Anjou zoge. Am 18. Novämber 1267 isch derno dr Konradin vum Papscht Clemens IV. exkommuniziert un as Chenig vu Jerusalem abgsetzt wore.

Am 24. Juli 1268 isch dr Konradin unter Jubel z Rom yyzoge, noch em Abzug us Rom hän dr Konradin un dr Friedrich dr Karl vu Anjou im Arnodal gschlaa. Am 23. Augschte isch s wider zuen ere Schlacht chuu un wider sin di bede Frynd im Vordeil gsi. Dur e blanlosi Verfolgig vum Fynd het sich s Blatt aber gchehrt un di bede sin bi Tagliacozzo in dr Abruzze bi dr Schlacht bi Tagliacozzo vum Karl vu Anjou bsiigt wore. Am 8/9. Septämber 1268 sin di bede Frynd gfange gsetzt un an dr Karl vu Anjou ibergee wore. Dää het sii un 10-15 Begleiter, uf Bedryybe vum Chenig Ottokar Přemysl, unter fadeschyynige Argumänt am 29. Oktober 1268 z Neapel zum Dod verurteile un chepfe loo. Si sin derno in uugweitem Grund verlocht wore.

Literatur

Friedrich Wilhelm Schirrmacher: Friedrich, Herzog von Oesterreich und Steiermark und Markgraf von Baden. In: Allgemeine Deutsche Biographie (ADB). Band 8, Duncker & Humblot, Leipzig 1878, S. 283 f.
Friedrich Wilhelm Schirrmacher: Die letzten Hohenstaufen, Göttingen 1871, S. 309–392 online in der Google Buchsuche
Johann Christian Sachs: Einleitung in die Geschichte der Marggravschaft und des marggrävlichen altfürstlichen Hauses Baden, Frankfurt und Leipzig 1764, Erster Theil, S. 376–386 uf books.google.de
Friedrich von Raumer: Geschichte der Hohenstaufen und ihrer Zeit, Band 4, Leipzig 1857 online im internet archive (PDF; 20,5 MB)

Weblinks

Commons: Friedrich I. vu Bade – Sammlig vo Multimediadateie

Vorgänger	Amt	Nochfolger
Hermann VI.	Markgrof vu Bade Markgrof vu Verona 1250–1268	Rudolf I.
Hermann VI.	Herzog vu Eschtryych 1250–1251	Ottokar II. Přemysl

Dä Artikel basiert uff ere fräie Übersetzig vu dere Version vum Artikel „Friedrich_I._von_Baden_(Markgraf)“ vu de dütsche Wikipedia. E Liste vu de Autore un Versione isch do z finde.