Günter Vetter

Dr Günter Vetter (* 4. Juli 1936 z Dorabira; † 6. Oktober 2022) isch e eschtrychische Bolitiker (ÖVP) un Unternämer gsii. Dr Vetter isch vu 1984 bis 1989 as Landesroot Mitglid vu dr Vorarlberger Landesregierig gsii.

dr Günter Vetter (1984)

Uusbildig un Beruef

Dr Günter Vetter isch am 4. Juli 1936 as Suhn vum Ludwig un dr Paula Vetter in dr Vorarlberger Stadt Dorabira uf d Wält chuu. In syre Haimetstadt isch er au uf Volksschuel un d Unterstufe vum Bundesgimnasium Dorabira gange. Är het in zwai NJohr d Handelsschuel Luschtenou absolviert un no anne 1952 e Lehr as Schtaimetz im Schtaimetzbedrib vu dr Eltere aagfange. Die Lehr het er 1955 mit dr Gsellebriefig abgschlosse.

Vu 1958 bis 1960 isch dr Vetter zuesätzli uf di dreisemeschtrig Bundesfachschuel fir Schtaitächnik z Salzburg gange, wun er anne 1960 au d Maischterbriefig abglait het. Är isch as Schtaimetzmaischter in dr Bedrib vum Vater yygstige un het en per 1. Jänner 1962 ibernuu. Am 19. Juli 1968 het er d Inge Stembal ghyrote, mit ire het er zwoo Dechtere ghaa (* 1969 un * 1971). Ab 1975 isch er derzue au grichtli veraidete Sachverständige fir s Schtaimetzwäse gsii. Anne 1997 het dr Günter Vetter d Gschäftsfierig vum aigene Schtaimetzbedrib an e langjehrige Mitarbaiter abgee un 2008 het er au as Grichtssachverständige ufghert.

Anne 1991 isch em Vetter dr Beruefstitel „Kommerzialroot“ verliie wore, 1992 het er vu dr Bundesinnig vu dr Schtaimetz s Guldi Ehrezaiche iberchuu. Är isch vu 1968 bis 1993 Landes-Innigsmaischter vu dr Schtaimetz un 1975 bis 1980 Stellverdrätter vum Bundesinnigsmaischter gsii.

Bolitischi Karriere

Anne 1965 isch dr Günter Vetter zum erschte Mol fir d ÖVP Vorarlberg zum Ersatzmitglid vu dr Dorabirar Stadtverdrättig gwählt wore. 1972 isch er zum vollwärtige Mitglid vu dr Stadtverdrättig gwehlt worfe un isch dert fir d ÖVP bis 1980 im Böu-, Schuel- un Stroßenuusschuss gsii. Am 6. Novämber 1984 isch dr Günter Vetter vum domolige Landeshauptmann Herbert Keßler as Landesroot fir Gwärb un Stroßeböu, Hochböu un Främdeverchehr in d Landesregierig gruefe wore. Die Funktion het er au noch em Wägsel an dr Regierigsspitz dur dr Ruggdritt vum Keßler in dr Regierig vu sällem sym Noofolger Martin Purtscher ghaa. Mit em Änd vu dr Legislaturperiod am 24. Septämber 1989 isch dr Vetter wider us dr Landesregierig uusgschide.

Weblink

 Commons: Günter Vetter – Sammlig vo Multimediadateie

• Biografy vum Günter Vetter uf dr Websyte vum Vorarlberger Landdag.

Fueßnote

Dä Artikel basiert uff ere fräie Übersetzig vu dere Version vum Artikel „Günter_Vetter“ vu de dütsche Wikipedia. E Liste vu de Autore un Versione isch do z finde.