Schorsch Friedel

Dr Schorsch Friedel (* 19. Juli 1865 z Mülhuuse; † 11. Dezämber 1933 z Stroossburg) isch e französische Mineralog und Kristallograf gsi.

Si Lääbe

Dr Schorsch Friedel isch dr Soon vom berüemte Chemiker Charles Friedel gsi. Er het an dr École Polytechnique z Bariis und an dr École nationale supérieure des mines de Saint-Étienne studiert und isch e Schüeler vom François Ernest Mallard (1833–1894) gsi. 1893 het er e Brofessur an dr École Nationale des Mines überchoo, won er spööter au Diräkter worde isch. Noch em Erste Wältchrieg isch er as Brofässer an dr Uniwersidäät Stroossburg ins Elsass zruggchoo. 1930 isch er us gsundhäitlige Gründ vorzitig in Ruestand dräte. Dr Friedel isch verhürootet gsi und het fümf Chinder gha. Er isch 1933 gstorbe.

Si wüsseschaftligs Wärk

Grad wie si Leerer Mallard het sich dr Friedel mit de Theorie vom Auguste Bravais abgee. Dr Friedel het die theoretische Grundlaage vom Bravais (Bravais-Gitter) mit Hilf vo Rönggebüügigexperimänt an Kristallgitter chönne noochwiise und het so dr füsikalisch Bewiis gliiferet. Äini vo de wichdigste Entdeckige bi sine Aarbede isch s Friedelsche Gsetz gsi.

Si Soon Edmond Friedel het spööter zämme mit em Louis de Broglie die erste Büügigsexperimänt an Flüssigkristall gmacht.

Wichdigi Publikazione

Groupements cristallins (1904)
Etudes sur les lois de Bravais (1907)
Les états mésomorphes de la matiere (1922)

Weblingg

Biografii uf www.annales.org (französisch)
Georges Friedel et les phases mésomorphes de la matière (französisch)
Digitalisierti Wärk vom Friedel - SICD der Universitäten von Strasbourg

Dä Artikel basiert uff ere fräie Übersetzig vum Artikel „Georges_Friedel“ vu de dütsche Wikipedia. E Liste vu de Autore un Versione isch do z finde.