Gschlächtsmerkmol

D Gschlächtsmerkmol si d Äigeschafte, wo bi de Gschlächter von ere Dierart underschiidlig usbrägt si. Es git primääri, sekundääri und tertiääri Gschlächtsmerkmol.

Dr Chamme vom ene Güggel isch e sekundäärs Gschlächtsmerkmol.

Die primääre Gschlächtsmerkmol

Primääri Gschlächtsmerkmol si d Gschlächtsorgan, wo diräkt dr Furtpflanzig diene, wie z. B. d Vagina, d Äierstöck, d Gebäärmueter, d Hoode, d Nääbehoode, d Soomewääg und dr Penis. Si si scho bi dr Geburt vorhande.

Die sekundääre Gschlächtsmerkmol

Sekundääri Gschlächtsmerkmol si nit diräkt in dr Reprodukzioon involviert und entwiggle sich noch dr Gschlächtsrifi, wie z. B. die wiibligi Brust oder dr Chamme vom Güggel. Sekundääri Gschlächtsmerkmol si phüüsischi Merkmol, wo dur die sexuelli Selekzioon chönne veränderet wärde. Si mache vilmol en Individuum em andere oder au em äigene Gschlächt gegenüber die attraktiver, hälfe, sich eme Konkurränt gegenüber duurezsetze oder si nützlig bim Ufzie vo de Junge. Vilmol beträffe si d Fäädere bi de Vöögel, Hoor bi de Süüger, s Gebiss oder s Skelett, Hörner und Gweih, Milchdrüese bi Süüger oder dr Bütel bi Büteldier.

Die tertiääre Gschlächtsmerkmol

Tertiääri Gschlächtsmerkmol si sustigi Gschlächtsmerkmol, wo sich uusebilde, wenn s Dier gschlächtsrif wird. So wird d Farb vo de Männli bi de Welsartige dünkler, s Becki bi de Fraue bräiter oder d Manne körperlig gröösser. Au Merkmol vom Verhalte und vo dr Psüche ghööre zu de tertiääre Gschlächtsmerkmol.

Fuessnoote

Dä Artikel basiert uff ere fräie Übersetzig vum Artikel „Geschlechtsmerkmal“ vu de dütsche Wikipedia. E Liste vu de Autore un Versione isch do z finde.