Glattburg bi Oberbüre

Dä Artikel bischribt d Glattburg vo de Schenke vo Landegg gegenöber vo Glattmündung i d Tuur. För d Giele-Glattburg bi Niderglatt lueg Glattburg (Niederglatt).

D Glattburg o Schenke-Glattburg gnennt, zom Onderschaide vo de Giele Glattburg bi Niderglatt, isch e mittelaalterlichi Burg gsii. De Platz isch scho i de Bronzezitt biwonnt woore und zwoo röömischi Münze zaiget, as i de Röömerzitt do ebefalls Lütt gsii sinn. Hütt stoot do s Frauechlooster Sant Gallebeerg, wo zom Benediktiiner-Oorde ghöört. D Glattburg ghöört zo de Gmaind Oberbüre im sanggaller Förschteland.

e Luftbild fo de Glattburg usem Joor 1954

Laag ändere

Östlich vo de Iimündig vo de Glatt i Tuur litt ufere Terrasse öbere öppe 60 Meeter hööche Stailwand am Norduufer vo de Tuur d Glattburg. Uf beede Siite sind chliini aber tüüffi Bachtobel. Dromm isch die Terrasse vo Natuur uus nume vom Noorde her guet zuegängli. Me hett aber, woll im Mittelaalter, do e Grabe aaglait.

Gschicht ändere

Ufem Areal vom Chlooster hett mer vo 1970 bis 1974 chlinneri archäologische Grabige döregfüert. Debii sind prähistorischi Keraamik und Chnöche gfunde woore. Di keraamische Scherbe ghööred zo Becher, Schössle, Töpf, wo i di spooti Bronzezitt datiert were chönd, eender i di spööteri Phase, so grob um 1000 v.Chr. Zäme mit de Keraamik hettmer o Chnöche vo Chüe und Soi gfunne, wo vermuetli us de gliiche Zitt stamid. Obwoll s Areal vo de Glattburg nöd systemaatisch erforscht wore isch, chamer ahand vo dene Fünd anee, ass uf de Glattburg e spootbronzezittlichi Sidlig gsii isch.

1963 hett mer e röömischi Münze vom Chaiser Aurelian (270-275) gfunne und 1993 aini vom Chaiser Quintillus, wo nume 17 Tääg lang im September 270 regiert ghaa hett. Möglicherwiis is de Ort wääred de Uurue um 270 vo röömische Soldaate uufgsuecht woore.

E sanggallischi Uurchund usem Joor 788 nennt de Ort Clataburuhc und en anderi usem Joor 876 Glataburc. Binennt isch si nochem Flüssli Glatt. Die Burg hett im Spootmittelaalter a de Schenke vo Landegg ghört. Die hend, nochdem si ane 1353 d Stammburg Landegg im Rindl em Chlooster Maggenau verchauft hend uf de Glattburg gwont. Ane 1492 isch d Glattburg a d Schenke vo Kastel choo, wo denn 1621 vo de Reding vo Biberegg öbernoo woren isch. Die hend si denn 1649 as Chlooster Sanggale verchauft. Ane 1781 isch d Burg zomene Chlooster wore, wo no hütt i Bitriib isch.

Literatuur ändere

  • Martin Peter Schindler: Kirchberg SG-Gähwil, Alttoggenburg/St. Iddaburg und Oberbüren SG-Glattburg : zwei prähistorische Siedlungen im unteren St. Galler Thurtal, Jahrbuch der Schweizerischen Gesellschaft für Ur- und Frühgeschichte 81 (1998), 7-22.