S Huus zum Löiezorn

47.5567547.586189

S Rönessansdoor vom Huus zum Löiezorn

Dialäkt: Baseldütsch

D Fassaade vom Nääbehuus mit de Wandmoolereie

S Huus zum Löiezorn isch e dänggmolgschützts Geböid am Gämsbärg 2-4 in dr Stadt Baasel. Im Huus isch e Restorant und es het Stuube für Veräin und Verbindige. Under anderem si d Zümft zu Schniider und zu Gärber im Huus dehäi.

S Huus isch vor allem berüemt für si Festsaal im erste Stogg, wo mit brächtige Rönessans-Intarsie us em 16. Joorhundert usgstattet isch.

Gschicht

S Huus isch im Groosse Ärdbeebe 1356 yerstöört und denn wider nöi baut worde. 1495 het mä bärguf e Nääbegeböid baut, wo mä an dr Fassade von em im Joor 1968 alti Wandmoolereie entdeggt und restauriert het.

1555 het sich dr italiänisch Händler Balthasar Ravelasca z Baasel niidergloo und denn im Löiezorn hüüslig gmacht. 1560 het er s Rönessansportal lo baue. Bis 1580 het er dr Saal im oobere Stogg mit Intarsie lo schmügge, ere Kunst won er us siner Häimet guet kennt het. D Bilder, Ornamänt und Muster si us underschiidlige Holzfurnier zämmegsetzt. Wie au uf dr Fassade vom Nääbegeböid, si au im Festsaal d Motiv perspektivisch daargstellt. Wo denn spööter im Barock dr Gschmack sich gänderet het, si fast überall die Rönessansbilder verschwunde, nume im Löiezorn si si bliibe. Au wo mä s Huus im 18. Joorhundert umbaut het, het mä d Intarsie lo si. Dr Grichtsher Daniel Mitz, wo 1718 dr Bsitzer vom Huus gsi isch, het dr Wärt und d Bedütig vo dene Intarsie verstande und sä gschützt wie s au d Bsitzer vom Huus noch im doo häi.

Kwelle

• Basler Renaissance-Schatz – der Intarsiensaal im Haus zum Löwenzorn uf dr Website vo dr Schwizer Dänggmolpflääg