Hoochstift

D Usdrück Hoochstift (as Metropolitanbistum Erzstift) und spööter im Zuug vo dr territoriale Emanzipazioon Fürstbistum oder Fürsterzbistum bzw. Fürststift oder Fürsterzstift bezäichne im Häilige Römische Riich bis 1803 im Allgemäine e gäistligs Territorium, wo die staatligi Suweränidäät din vom ene Bischof as Landesfürst, em Fürstbischof, usgüebt worde isch. Zitgenössisch het mä dene Territorie vilmol au nume Stift gsäit, oder, wenn si im Riich glääge si, au spezieller Riichsstift. D Hoochstift häi Riichsständ bildet und e Sitz und e Stimme uf dr Gäistlige Bank im Riichsdaag vom Alte Riich gha.

Lang het mä die Begriff as Sünonüüm brucht, aber hützudags brucht mä mäistens dr Begriff Fürstbistum, für zum s historische Territorium z bezäichne, wo bis zum Riichsdeputazioonshauptschluss 1803 e Riichsstand vom Häilige Römische Riich bezäichnet het.

Dr Ursprung vom Begriff

Dr zwäit Däil vom Wort Hoochstift, Stift, isch für d Ländereie gstande, wo as Stift im Sinn vo Stifdige vo Köönig und Herzöög an e Kathedra, das häisst an e Sitz vom ene hooche religiööse Würdedrääger wie e Bischoff usw., vergee worde isch. Dr erst Däil vom Wort underschäidet si vo Chlooster- und andere Stifdige oono staatligi Suweränidäät.

Dä Artikel basiert uff ere fräie Übersetzig vum Artikel „Hochstift“ vu de dütsche Wikipedia. E Liste vu de Autore un Versione isch do z finde.