Internationaler Muettersproch-Dag

Dr 21. Februar isch sid 1999 dr International Muettersproch-Dag (französisch Journée internationale de la langue maternelle; änglisch International Mother Language Day). Es isch e Maantag, wo d UNESCO is Lääbe grueffe het.

um was goot s ?Bearbeite

Dr Zweck vum Gedänkdag isch, di sprochlichi un kultureli Viilfalt un d Mehrsprochigkeit vürschi z bringe. Me weiss jo: über d Hälfti vo de über 6.000 Sproche vo dr Wält sin uf langi Sicht vum Usstärbe bedroht.

 
Dänkmol z Bangladesch für di Doote im Champf um s Sprochrächt für s Bengali

HintergrundBearbeite

Dr Gedänkdag goot uf Unruhe z Oschtpakistan (hüt Bangladesch) im Johr 1952 zrugg. D Regierig vo Pakistan het doo bschlosse, s Urdu zur einzige Amtssproch vom Land z mache, e Sproch, wo numme vunere winzigi Minderheit gsproche worre isch. Z Oschtpakistan, wo d Mehrheit vo dr Bevölchrig gläbt het, redt me vor allem Bengali. Dr Governeur vo Pakistan, dr Khawaja Nazimuddin, het erklärt: "Urdu un numme Urdu wird d Amtssproch vo Pakistan sy". Binere Demonschtration drgäge het d Polizei am 21. Februar mehreri Mänsche verschosse.

D Regierig het druf noogää un s Bengali het glychi Rächt als Amtssproch überchoo. D Sprochbewegig het d Spannigi zwüsche Oscht- un Weschtpakistan wyter aagheizt un het 1971 zur Unabhängig vo Bangladesch gfüert.

dr Linguapax-PrysBearbeite

Jeds Johr am 21. Februar wird vo dr UNESCO dr Linguapax-Prys vergebe.

2006 isch dr Prys aa d Natividad Mutumbajoy, e Ingano-Indianeri us Kolumbie gange, wo sich mitenere Schüel für d Erhaltig vo dr Sproch vo ihrem Volch starch gmacht het.

S Thema vom Joor 2007 isch d Mehrsprochigkeit gsi.

2007 isch dr Prys aa d Maya Khemlani David us Malaysia gange, wo syt Joore de Sprochwäggsel unter de sprochliche Minderheite vo Malaysia untersuecht.

2019 het en dr Larry Kimura vo dr Uni Hawaii übercho, wo sich für d Ernöierig vo dr yheimische Sprooch vo dr Inslegrupe ysetzt.

WeblinkBearbeite