Dr Ionisch Ufstand

Dr Ionisch Ufstand isch d Rebellion vo de chläiasiatische und züprische Grieche gege die persischi Oberherschaft im 5. Joorhundert v. d. Z. gsi.

Vorgschicht

Wo 547/546 v. d. Z. d Perser s lydische Riich vom Köönig Krösus zerstöört häi, isch Ionie Däil vom persische Riich worde. D Perser häi ene die inneri Autonomii gloo und dr Groossköönig het Satrape iigsetzt, wo dr Dribut iidriibe häi. Dr Herodot verzelt, ass dr Aristagoras, wo vo de Perser as Tyrann vo Milet iigsetzt worde isch, d Perser überreedet het, Chrieg gege Naxos z mache. Das isch aber abverheit und dr Aristagoras het Angst ghaa, zur Verantwortig zooge z wärde und het die andere Ionier überreedet, vo Persie abzfalle. Dr äigentlig Grund isch aber woorschinlig eender gsi, ass d Politik vo de Perser dr Handel vo de Ionier mit Egüpte und de griechische Stedt am Schwarze Meer gstöört het.

Dr Ufstand

Die ionische Poleis häi sich erhoobe, aber vo Griecheland isch nume vo Athen und vo Eretria Hilf choo. D Athener häi 499/98 v. d. Z. zwanzig Schiff gschiggt und d Eretrier fümf. D Perser häi e Zitli brucht, zum reagiere, aber scho 497 v. d. Z. häi si Züpere zruggerooberet und vo de ufständische Poleis si nume no nöön übrigbliibe. die Widerstand leisteten. 494 v. d. Z. isch schliesslig Milet noch dr Schlacht vo Lade erooberet und aabebrennt worde. D Ionier häi sich em persische Groossköönig Dareios I. müesse underwärfe. Dä het d Rolle, wo Athen im Ufstand gspiilt het, nie vergässe und en Aagriff uf Griechalnd blaant, wo as Perserchrieg in d Gschicht iigange isch.

Lueg au

Persie

Litratuur

Karl-Wilhelm Welwei: Das klassische Athen. Demokratie und Machtpolitik im 5. und 4. Jahrhundert, Darmstadt 1999, S. 27-31.