Jechiel ben Josef

Dr Jechiel ben Josef vo Bariis (* am Ändi vom 12. Joorhundert z Meaux; † um 1286^[1] in Palestina) isch e Rabbiner, Talmudist und Tosafist us Nordfrankriich gsi.

Lääbe

Dr Jechiel ben Josef isch e Schüeler vom Rabbi Juda ben Isaak Messer Leon gsi und si Noochfolger as Rosch Jeschiva vo Bariis. Er het e hufe Tosafot gschriibe. Bekannt isch er as Gegner vom Nikolaus Donin bi dr Bariiser Talmuddisputazioon vom Joor 1240 worde, wo zur erste groosse Verbrennig vom Talmud gfüert het. Er isch aber witer dr Läiter vo dr Bariiser Schuel bliibe, bis er um 1260 mit eme Däil vo sine Aahänger uf Israel usgwanderet isch und sich z Akko niidergloo het.^[2] Dört het er d Talmudschuel Midrasch ha-Gadol de-Paris gründet und isch in de spöötere 1260er Joor gstorbe.

Es git aber au sonigi, wo sääge, ass er nie Alija gmacht häig und bis an sis Lääbensänd z Bariis gläbt häig.

Weblingg

Israel Moses Ta-Shma: «Jehiel ben Joseph of Paris». In: Encyclopaedia Judaica. 2. Uflaag. Band 11, Detroit/Nöi York u. a. 2007, ISBN 978-0-02-865939-8, S. 103 (änglisch).

Fuessnoote

↑ 1286 isch s Doodesjoor noch dr Jewish Encyclopedia (1901–1906). Noch dr Encyclopaedia Judaica, 2. Uflaag (2007) isch er um 1265 gstorbe.
↑ Michael Krupp: Der Talmud – Eine Einführung in die Grundschrift des Judentums mit ausgewählten Texten, GTB Sachbuch, Gütersloh, 1995, S. 98.

Dä Artikel basiert uff ere fräie Übersetzig vum Artikel „Jechiel_ben_Josef“ vu de dütsche Wikipedia. E Liste vu de Autore un Versione isch do z finde.

[1] 1286 isch s Doodesjoor noch dr Jewish Encyclopedia (1901–1906). Noch dr Encyclopaedia Judaica, 2. Uflaag (2007) isch er um 1265 gstorbe.

[2] Michael Krupp: Der Talmud – Eine Einführung in die Grundschrift des Judentums mit ausgewählten Texten, GTB Sachbuch, Gütersloh, 1995, S. 98.

[1]

[2]