Johann Jakob Bausch
| Dialäkt: Schwäbisch |
Dr Johann Jakob Bausch (* 25. Juli 1835 en Groß-Sieße, † 14. Februar 1926 z Rochester em US-amerikanischa Staat New York), ischt a deitsch-amerikanischer Induschtrii-Pioniir gwäa.
Aus seim Leaba ändere
Dr Johann Jakob Bausch kommt am 25. Juli 1835 z Groß-Sieße em Oberamt Geislenga als Soh vo-ma Becker uff d Welt. Trotz-em Handwerksberuaf vom Vadder leabt dui Familie Bausch en-ra graußa Armut. Abr trotz älle Widrichkeida schafft’s der Bua, dass’r noch-em Bsuach vo dr Volksschuel a Lehr als Opdiker macha koo. Wia-nr do drmit ferdich ischt, kriagt’r sei erschda Stell en dr Schweiz. Seine Hauptbeschäfdigonga send deet s Schleifa vo Gleeser ond s Durchfihra vo leichde Repradura. Des Gschäft hangt-em abr bald zom Hals raus, weil’s-em viil-zo ei-teenich ischt. Drom fasst’r da Entschluss – er ischt enzwischa knabb 19 Johr alt – sei Glick wia viile Andre au en dr Neia Welt zo suacha.
Em Bausch sei Leaba en de Voreinigde Staada vo Amerika (USA) vorlauft zonägscht et so, wia-nr sich des vorgschdellt hot: Bloß miiasam ko-nr sich mit Gleagaheitsarbeida ibr Wasser halda. Wia-nr no au noh beim Säaga zwoi Fenger vorliirt, scheint’r vo ällem Glick vorlassa zo sei. Trotzdem loot sich der Moo et ondrkriaga. Mit dr finanziella Ondrstitzong vo seim hessischa Freind Henry Lomb grendet’r 1853 em amerikanischa Rochester a oigena Firma: Bausch & Lomb. Dui Firma ischt weltweit de erschd, wo Brillagschdell aus Hartgommi herstellt, ond uff dui „Erfendong” hot d Welt anscheinend grad gwardet. Vo jetzt oo wuud dr Bausch vom Erfolg so richdich vorwehnt.
Am 14. Februar 1926 schliaßt dr Johann Jakob Bausch als wohlhabender Ondrnehmer ond oo-gsehener Birger en seira amerikanischa Wahlhoimet Rochester d Auga fir emmer. Stolze 91 Johr alt isch’r worra.
Litradur ändere
- Lebensbilder aus Schwaben und Franken, Band 9, Kommission für Geschichtliche Landeskunde in Baden-Württemberg, W. Kohlhammer Verlag, 1963, S. 374f
- Schneiderhan: Ein Süßener Industriepionier in USA
- Burkhardt: Zur Geschichte der Familie Bausch in Süßen
- Vatter: Vom Filstal an den Ontariosee (JJBausch)
Quella ändere
- Helmut Engisch: Der Zeiss von Amerika, an Ardikl en dr Stuegerter Zeidong em Rahma vo dr Reihe Landsleute, Ausgab fir da Kreis Beblenga, Wochaendbeilag vom 17. Dezember 2016, S. W 23