Johannes Fatio

Dialäkt: Baseldütsch

Dr Johannes Fatio (14. Juni 1649 z Baasel; † 28. Septämber 1691 z Baasel) isch e Basler Mediziner und Revoluzzer gsi.

Johannes Fatio

S Läbe

Dr Fatio isch 1649 z Basel uf d Wält cho und am 14. Juni dauft worde. Er isch dr Sohn vom Johann Anton Fatio und dr Christina Henricpetri gsi. 1662 het ere sich an dr Basler Uni iigschriibe. 1672 isch er Mitgliid vo dr Schererzumft, wo d Chirurge drzue ghört hai, worde. Si Dokter het er vo dr Universität vo Valence übercho. 1673 het er d Margaretha Schönauer ghürotet. Won er 1678 het welle aggregatus wärde an dr medizinische Fakultet, het en d Uni abgwiise. 1688 het si en beschuldigt, e Kurpfuscher z si. Dr Fatio het aber as Chirurg und Geburtshälfer gschafft und isch sehr beliebt und erfolgriich gsi. 1690 het er «Helvetisch-Vernünftige Wehe-Mutter» verfasst, wo für si Zit e sehr fortschrittligs Wärk über Geburtshilf gsi isch, aber erst 1752 z Basel erschiine isch, wil dr Root dr Fatio 1691 as Revoluzzer het lo chöpfe und das als abschreckends Bischbil de Lüt het welle vor Auge halte. Dr Fatio het vom berüehmte Geburtshälfer an dr Pariser Maternité, em François Mauriceau (1637-1709), glehrt und in siim Buech Fäll us siiner Praxis aagfüehrt.

Si Rolle im 1691er-Wäse

Lueg au s 1691er-Wäse

Wo am Aafang vo de 1690er Johr dr Groossroot dr Chlii Root het afo entmachde, hai d Zümft Reforme verlangt, wo witergange si, ass die, wo dr Grossi Root het welle iifüehre. D Zümft hai Usschüss afo bilde und si zerst vom Jakob Henricpetri aagfüehrt worde. Wo si aber hai afo dängge, ass dä mit em Groosse Root well gmeinsami Sach mache, hai si Ändi Februar 1691 dr Fatio zu ihrem Aafüehrer gmacht. Si hai allerhand Reforme usgarbeitet, aber scho im Summer het sich die reformerisch-demokratischi Bewegig gspalte und dr Fatio isch vom Groosse Root festgnoh worde und im Rhiidoorgfängnis igsperrt worde. Zsämme mit zwei andere Füehrer vo de Zümft, em Johannes Müller und em Hans Konrad Mosis, isch er zum Dod verurdeilt und uf em Märtblatz köpft worde. Si Chopf isch am Rhiidoor as Warnig für anderi potentielli Revoluzzer ufgsteggt worde.