Johannes I.

Dr Johannes I. († 18. Mai 526 z Ravenna) isch vum 13. Augschte 523 bis zue sym Dod Papscht gsii.

Lääbe un Wirke

Är isch us dr Toskana (vu Siena oder Castello di Serena, in dr Nehi vu Chiusdino) un um d Zyt vu syre Wahl scho seli alt gsii.

Gege sy Protescht isch er 525 vum arianische Chenig vu dr Oschtgote, em Theoderich, uf Konstantinopel gschick wore, go mit em Chaiser Justin I. un sällem sym Caesar Justinian iber e chaiserli Dekret vu 523 verhandle, wu si gege d Arianer grichtet ghaa het. As erschte Papscht het er dodermit Oschtrom bsuecht. Dr Theoderich het dermit droht, ass es Repressione gege trinitarischi Chrischte z Italie gääb, wänn im Johannes sy Mission fähl schlaat.

Z Konstantinopel isch dr Johannes mit fascht chaiserlige Ehre empfange wore. Är het in Aawäsehait vum Chaiser e Mäss gfyyrt un em Justin derno d Chrone uf dr Chopf gsetzt: Im Gottedienscht sin di oschtremische Chaiser als ohni Chopfbedeckig gsii, un normalerwys het dr Patriarch vu Konstantinopel si als derno wider gchrent. Dr Justin het die Ehr demonschtrativ em remische Papscht iberloo. Zum Dekret vu 523 het si dr Chaiser verhandligsberait zaigt.

Wu dr Johannes uf Ravenna, em Theoderich sy Hauptstadt, retuurchuu isch, het dää dr Papscht mit dr Aaschuldigig verhafte loo, är heeb si mit em Chaiser Justin gege d Oschtgote verschwore. Är isch z Ravenna feschtghalte wore un isch dert bal wäg dr schlächte Behandlig gstorbe.

Sy Lyych isch uf Rom iberfiert un dert z Alt-St. Peter vergrabe wore.

In dr chrischtlige Chunscht wird dr Johannes I. als dargstellt, wien er dur s Gitter vun eme Gfängnis luegt, mit eme Diakon un eme Subdiakon. Är wird vor allem z Ravenna un i dr Toskana as Hailige verehrt. Dr Mahndag isch dr 18. Mai, sy Dodesdag.

Literatur

Adolf Jülicher: Ioannes 49. In: Paulys Realencyclopädie der classischen Altertumswissenschaft (RE). Band IX,2, Stuttgart 1916, Sp. 1808.
M. Vitiello: „Cui Iustinus Imperator venienti ita occurrit ac si Beato Petro“. Das Ritual beim ersten Papst-Kaiser-Treffen in Konstantinopel: Eine römische Auslegung? In: Byzantinische Zeitschrift 98, 2005, S. 81–96.

Weblink

Commons: Papscht Johannes I. – Sammlig vo Multimediadateie

Ökumenisches Heiligenlexikon
Ytrag in d Catholic Encyclopedia, Robert Appleton Company, New York 1913 (änglisch)

Vorgänger	Amt	Nachfolger
Hormisdas	Papscht 523–526	Felix III.

Dä Artikel basiert uff ere fräie Übersetzig vu dere Version vum Artikel „Johannes_I._(Papst)“ vu de dütsche Wikipedia. E Liste vu de Autore un Versione isch do z finde.