Johannes XIII.

Dr Johannes XIII. (* z Rom; † 6. Septämber 972 ebe dert) isch vum 1. Oktober 965 bis 972 Papscht gsii.

Pontifikat

Noch em Dod vum Papscht Leo VIII., wu vum Otto I. unterstitzt woren isch, isch dr Johannes uf Bedrybe vum Chaiser un in Gegewart vu dr chaiserlige Gsandte Bischof Liutprand vu Cremona un Otger vu Speyer gwehlt wore. Är isch mit em Alberich II. vu Spoleto verwandt gsii – villicht e Suhn vu dr Theodora dr Jingere, dr Schweschter vu dr Marozia – un isch villicht us dr Familie vu dr Crescentier gsii, wu in syre Amtszyt iri Macht z Rom stark hän chenne uusböue. Vor sym Pontifikat isch er vu 961 bis 965 Bischof vu Narni un Bibliothekar vu dr Remische Chilche gsii.

In syre gsamte Amtszyt isch er uf dr Syte vum Otto I. gstande. Wäge sym autoritäre Stil isch er bi me Ufstande vu chaiserfyndlige Fraktione zytwys in Gfangeschaft gsii, wun er schließli drus het chenne flichte. Wu dr Chaiser zum vierte Mol uf Rom chuu isch, het er e hert, aber uubluetig Gricht abghalte. Dr Chaiser het dr Chilchestaat wider härgstellt un s Patrimonium Petri au no greßer gmacht. Derno het er dr Adalbert vu Ivrea, wu ne letscht Mol ufgstande isch, uf Korsika verdribe, wu si sällem sy Spure verliere.

Dr Papscht het am 25. Dezämber 967 dr Suhn vum Chaiser Otto, dr Otto II., zum Mitchaiser gchrent. Dodermit het dr Vater d Dronfolg im Hailige Remische Rych welle sichere. Anne 967 het er uf ere Synod z Ravenna s Bischtum Magdeburg zum Erzbischtum glupft. Des Bischtum het as Uusgangspunkt vun ere neie Slawemission dient. Am 19. April 972 het dr Johannes XIII. dr Otto II. mit dr byzantinische Brinzässi Theophanu dröut. Dur s Lupfe vu Capua un Benevent zue Erzbischtimer het er aber d Spannige mit dr Oschtchilche greßer gmacht, wel bodi Stedt bis dert unter byzantinischem Yyfluss gstande sin.

Dr Johannes XIII. isch am 6. Septämber 972 z Rom gstorbe.

Literatur

• R. Barth, F. Bedürftig: Taschenlexikon Päpste. Piper, München 2000.
• Georg Kreuzer: Johannes XIII. (Papst). In: Biographisch-Bibliographisches Kirchenlexikon (BBKL). Band 3, Herzberg 1992, ISBN 3-88309-035-2, Sp. 210–212.
• Johann Peter Kirsch: Pope John XIII. In: Catholic Encyclopedia, Robert Appleton Company, New York 1913 (änglisch)
• Johannes XIII., In: Hans Kühner: Lexikon der Päpste

Weblink

 Commons: Johannes XIII. – Sammlig vo Multimediadateie

Vorgänger	Amt	Nachfolger
Leo VIII.	Papscht 965–972	Benedikt VI.

Dä Artikel basiert uff ere fräie Übersetzig vu dere Version vum Artikel „Johannes_XIII._(Papst)“ vu de dütsche Wikipedia. E Liste vu de Autore un Versione isch do z finde.