John Gore

Dr John Gore (* 1729 oder 1730 im Middlesex County z Virginia; † 10. Septämber 1790 z Greenwich) isch e britisch-amerikanische Seemaa gsi, wo für die britischi Royal Navy uf dr HMS Dolphin under em John Byron und em Samuel Wallis mitgseeglet isch.

E Bordret vom John Gore vom John Webber, 1780

Lääbe

Dr Gore het dr James Cook uf dr erste und dritte Expedizioon begläitet. Uf dr dritte Expedizioon het er, wo dr James Cook und dr Charles Clerke dood gsi si, s Kommando übernoo. 1771 het er s Schiff vom Botaniker Joseph Banks uf ere Räis uf Island und zu de Hebride kommandiert. Er isch am 3. Oktober 1780 zrugg choo und isch denn zum Postcaptain beförderet worde. Er het vo denn aa z Greenwich dr Boste vom James Cook am Greenwich Hospital übernoo und isch dört 1790 gstorbe.

Im Gore si Soon, wo au John ghäisse het, isch 1795 Lütnant in dr Royal Navy worde.

Eerige

Noch em John Gore si dr Gore Point und d Gore-Halbinsle (Gore Peninsula) im alaskische Kenai-Fjords-Nationalpark vom Kapitän Nathaniel Portlock benennt worde. Dr Portlock, wo im 18. Joorhundert d Pazifikküste im Nordweste vo Amerika erforscht het, isch e guete Fründ gsi, und dr Gore het si Familie no us Virginia kennt.

Film

Im vierdäilige Färnseefilm Wind und Sterne het dr dütsch Schauspiiler Erich Hallhuber dr John Gore daargstellt.

Weblingg

• The Quiet Mariner - Captain John Gore (änglisch)

Fuessnoote

Dä Artikel basiert uff ere fräie Übersetzig vum Artikel „John_Gore“ vu de dütsche Wikipedia. E Liste vu de Autore un Versione isch do z finde.