John of Gaunt

Dr John of Gaunt, Herzog vo Lancaster, dt. Johann vo Gent, frz. Jean de Gand (* 6. März 1340 z Gent; † 2. Februar 1399 z Leicester) isch dr dritt Sohn vom König Eduard III. vo England und dr Philippa von Hainault, wo überläbt het. Si Zuesatz zum Name Gaunt (Gent) isch vo siim Geburtsort Gent im hütige Belgie abgleitet worde. Siini andere Ditel si Ritter vom Hosebandorde, Lord High Steward of England, Herzog vo Aquitanie, Earl of Derby, Earl of Lincoln, Lord of Bergerac & Roche-sur-Yon, Lord of Beaufort & Nogent und König vo Kaschtilie.

Dr Gaunt isch sehr riich gsi und het enorme Iiluss uf d Regierig währed dr Herrschaft vo siim Neveu Richard II. gha, und in dr Ziit vo dr politische Unrueh, wo druf cho isch. Er isch aber vorsichtig gnue gsi, ass män en nit offe mit de Gegner vom Königs hätt chönne in Verbindig bringe.

Zum John of Gaunt siine legitime Nochkomme, vom Huus Lancaster, hai die änglische König Heinrich IV., Heinrich V., und Heinrich VI. ghört. Zum John of Gaunt siine Nochfahre, wo zerschd illegitim, aber denn mit dr Hürot mit dr Catherine Swynford im Johr 1396 legitimiert worde si, het dr John Beaufort 1. Earl of Sommerset ghört, däm si Groossdochder Margaret Beaufort wo schböter ins Huus Tudor iighürotet het, und weles mit em Heinrich VII. zum Dron ufgschtiigen isch. Anderi legitimi Nochkomme vom Gaunt si d Döchter Philippa of Lancaster, wo an der Siite vom König Johann I. vo Bordugal gregiert het und d Mueter vom Eduard gsi isch, d Elizabeth, Herzogin vo Exeter, wo d Mueter vom John Holland, 1. Herzog vo Exeter worden isch, und d Katherine (Catalina) of Lancaster, wo an der Siite vom König Heinrich III. vo Kastilie dr schbanisch Dron bestiige het. Sie isch d Groossdochder vom Peter I. vo Kastilie und d Mueter vom Johann II. gsi.

Wo dr John of Gaunt 1399 gschtorbe isch, si siis Land und siis Vermöge an d Krone gfalle, wil dr Richard II. im Gaunt si Erb Heinrich Bolingbroke 1398 ins Exil gschickt het. Dr Bolingbroke isch 1399 zruggcho und het dr Richard, wo wenig populär gsi isch, abgsetzt, und isch sälber as dr erscht Abkömmling vom John of Gaunt König worde, drHeinrich IV. vo Ängland.

Dr John of Gaunt isch näbe siiner erschte Frau, Blanche of Lancaster, im Chilleschiff vo der St. Paul's Cathedral im enä Grab us Elfebei, wo vom Henrich baut worden isch und däm vo siim Sohn ähnlig isch, in der Canterbury Cathedral) begrabe.

Chinder

John of Gaunt (* 1340 † 1399), Herzog vo Lancaster und Aquitanie ∞ 1359 Blanche of Lancaster (* 1345 † 1369)

1. Philippa (* 1360 † 1426), ∞ Johann I. vo Portugal (* 1357 † 1433)

2. John (* 1362 † 1365)

3. Elizabeth (* 1364 † 1426)

4. Edward (* 1365 † 1368)

5. John (* 1366 † 136x)

6. Henry (* 1367-† 1413), König vo Ängland 1399 ∞ 1380 Mary de Bohun (* 1369 † 1394)

1. Edward (* 1382 † 138x)

2. Blanche (* 1382 † 1409) ∞ 1402 Ludwig III. vo dr Pfalz

3. Henry (* 1387 † 1422), König vo Ängland 1413 ∞ 1420 Katharina vo Valois (* 1401 † 1437), Dochter vom Karls VI. vo Frankriich, in 2. Eh mit em Owen Tudor verhürotet und Grossmueter vom Henry Tudor ab 1485 König vo Ängland

1. Henry (* 1421 † 1471), König vo Ängland 1422 ∞ 1445 Margaret vo Anjou (* 1429 † 1481)

1. Edward (* 1453 † 1471), Prinz vo Wales

4. Thomas (* 1388 † 1422), Herzog vo Clarence

5. John (* 1389 † 1435), Herzog vo Bedford

6. Humphrey (* 1390 † 1446), Herzog vo Gloucester

7. Philippa (* 1394 † 1430), ∞ 1406 Erich VII. König vo Dänemark, Schwede und Norwäge

7. Isabelle(* 1368 † 136x)

Zweiti Eh mit dr Konstanze vo Kaschtilie:

1. Katalina (Katharina) Plantagenet (1372–1418), het dr König Heinrich III. vo Kastilie (1379–1406) ghürotet

2. John Plantagenet (1372–1375)

Dritti Eh mit siiner langjöhrige Mätresse Catherine Swynford:

1. John Beaufort, 1. Earl of Somerset (1373–1410), het d Margaret Holland (1385–1429) ghürotet

2. Henry Beaufort, (1375–1447), Kardinal

3. Thomas Beaufort, 1. Herzog vo Exeter (1377–1426), het d Margaret Neville ghürotet

4. Joan Beaufort (1379–1440), het (1) dr Robert Ferres, Baron Ferres vo Wemme († 1396); (2) Ralph Neville, Earl of Westmorland (1364–1425) ghürotet

Us der Beziehig mit dr Marie de St. Hillaire schtammt d Dochter

1. Blanche Plantagenet (1359–1388), wo dr Thomas Morieux ghürotet het

Literatur

Armitage-Smith, Sydney. John of Gaunt, King of Castile and Leon, Duke of Lancaster, &c.. Barnes & Noble, 1964.
Cantor, Norman F. The Last Knight: The Twilight of the Middle Ages and the Birth of the Modern Era. Free Press, 2004.
Goodman, Anthony. John of Gaunt: The Exercise of Princely Power in Fourteenth-Century Europe. St. Martin, 1992.
Walker, Simon. The Lancastrian Affinity, 1361– 1399. Clarendon Press, 1990.
Fryde, Natalie / Vollrath, Hanna. Die englischen Könige im Mittelalter: Von Wilhelm dem Eroberer bis Richard III.. Verlag C.H. Beck oHG, München 2004

Weblink

Dä Artikel basiert uff ere fräie Übersetzig vum Artikel „John_of_Gaunt“ vu de dütsche Wikipedia. E Liste vu de Autore un Versione isch do z finde.