Judas Maccabaeus

Judas Maccabaeus (HWV 63; dt. Judas Makkabäus) isch e Oratorium in drei Akt vom Georg Friedrich Händel.

Wie s entstande isch

Dr politisch Hindergrund vom Händel sim Oratorium isch dr Jakobiteufstand vo 1745. Am 2. August isch dr Charles Edward Stuart as Bretendänt uf en änglisch und schottisch Droon mit ere Invasionsarmee in Schottland glandet, het meereri chliineri Schlachte erfolgriich gschlaage und isch uf Ängland marschiert. Zum de Ängländer Muet mache het dr Händel am Aafang vo 1746 rasch s Occasional Oratorio komponiert, won e Pasticcio gsi isch. In dr Schlacht bi Culloden het die kööniglichi Armee under em Wilhelm August, Herzog vo Cumberland, won e Soon vom Georg II. gsi isch, am 16. April 1746 die ufständische Jakobite ändgültig gschlaage.

Dr Händel het denn e Wärk zu Eere vom Fäldheer gschriibe. Dr erst Akt het er vom 9. bis 21. Juli komponiert, dr zwäit vom 25. Juli bis 2. August. Am 11. August isch s ganze Wärk instrumentiert gsii.

D Uffüerig

D Uruffüerig het am 1. April 1747 im Theatre Royal in Covent Garden stattgfunde. Dr Judas Maccabaeus isch schnäll zum populärste Oratorium vom Händel worde, und isch immer wider ufgfüert worde. Dr Händel het no di noo non e baar attraktive Nummere us andere Oratorie drzuedoo.

S Libretto

Dr Thomas Morell het s Libretto noch em apokrüfe Erste Buech vo de Makkabäer (1 Makk 2-8) gschriibe. Er het au e baar Motiv us dr Antiquitates Judaicae vom Gschichtsschriber Flavius Josephus verwändet.

Litratuur

Hans Joachim Marx: Händels Oratorien, Oden und Serenaten.. Vandenhoeck & Ruprecht, ISBN 3-525-27815-2.
Albert Scheibler, Julia Evdokimova: Georg Friedrich Händel. Oratorien-Führer. Edition Köln, ISBN 3-928010-04-2.
Friedbert Schmidt: Conqu'ring hero's choicest treasure - Georg Friedrich Händels Oratorium „Judas Maccabaeus“ und seine agitatorische Funktion für das hierarchische England des 18. Jahrhunderts. Dissertation.de, ISBN 978-3-86624-446-7.
Dominik Höink, Jürgen Heidrich (Hrsg.): Gewalt - Bedrohung - Krieg. Georg Friedrich Händels „Judas Maccabaeus“. V & R Unipress GmbH, ISBN 978-3-89971-718-1.

Weblingg

Judas Maccabaeus: Note im International Music Score Library Project.
Partitur von Judas Maccabaeus (Händel-Wärkusgoob, uusegee vom Friedrich Chrysander, Leipzig 1865)

Dä Artikel basiert uff ere fräie Übersetzig vum Artikel „Judas_Maccabaeus“ vu de dütsche Wikipedia. E Liste vu de Autore un Versione isch do z finde.