Kerala
Kerala isch e Bundesstaat vo Indie.
Geografy ändere
Das Piet isch 38.863 Kwadratkilometer gross, es lyt im Südweschte vom indische Subkontinänt am Meer; das isch s Arabische Meer. Im Oschte, also gäge s Innere vom Land, het’s z Kerala e Bärglandschaft, im Weschte isch s Land zimli flach bis as Meer abe.
Im Bundesstaat Kerala woone meh weder drüedryssg Millioone Lüüt. Sini Hauptstadt isch Thiruvananthapuram. Es het 520 Stedt im Bundesstaat.
Sprooche und Literatur ändere
Me redt i däm Bundesstaat am meischte d Sprooch Malayalam. D Gränze vo däre Verwaltigsregioon isch nämli anne 1956 eso dur s Land zoge worde, das er rächt gnau dört isch, wo au s Sproochpiet vom Malayalam lyt. Dr Name «Kerala» bedüütet i dr yheimische Sprooch «s Land vo de Kokospalme».
Änglisch isch i der Wirtschaft und der Politik vo Kerala als Umgangssprooch no hüt wichtig.
Anderi Sprooche, wo vo ganz chlyne Minderheite z Kerala gredt wärde, sin s Tamil, s Tulu, s Konkani und s Koraga.
Im zwöite Joorhundert vo Chrischtus het e Prinz vom ene Königrych z Kerala s tamilische Buech Cilappatikaram gschribe. und au Schrifte vom Sanskrit sind i däm Piet entstande. Im zwölfte Joorhundert noch Chrischtus het d Prosaliteratur im Malayalam agfange.
Gschicht ändere
S Land Kerala isch no ere uralte Legände vom Parashurama gründet worde. Im Joor 52 isch der heilig Thomas, eine vo de chrischtlechen Aposchtle, bi Muziris, emen Oort vo Kerala, uf Indie cho. Und au susch het’s i der antike Zyt scho vil wirtschaftlichi Kontakt zum Piet vom Middelmeer ggää. Es sind denn nodisno es baar Königrych i däre Landschaft entstande, öpe das vo de Mooshika, das vo de Chera und das vo de Ays.
Anne 800 het dr König Kulasekhara s Rych vo de Chera wider ufbout, wo bis is elfte Joorhundert ghebt het. Denn sind anderi chyni Herrschaften ufchoo. 1275 het dr Marco Polo s Land psuecht.
Wo am 20. Mai 1498 der Vasco da Gama, e Kapitän us Portugal, bi Kappad z Kerala acho isch, het s Zytalter vo de öiropäische Kolonie z Indie agfange, wo bis anne 1947 ggangen isch. Zwöi Joor spöter isch Kerala e Bundesstaat vo Indie worde.
Literatur ändere
- Martin und Thomas Barkemeier: Kerala mit Mumbai und Madurai. Bielefeld 2001, ISBN 3-8317-1004-X.
Weblink ändere
Commons: Kerala – Album mit Multimediadateie| Hüütigi Bundesstaate |
Andhra Pradesh • Arunachal Pradesh • Assam • Bihar • Chhattisgarh • Goa • Gujarat • Haryana • Himachal Pradesh • Jharkhand • Karnataka • Kerala • Madhya Pradesh • Maharashtra • Manipur • Meghalaya • Mizoram • Nagaland • Odisha • Punjab • Rajasthan • Sikkim • Tamil Nadu • Telangana • Tripura • Uttarakhand • Uttar Pradesh • Westbengalen |
 |
| Unionsterritorie |
Andamanen und Nikobaren • Chandigarh • Dadra und Nagar Haveli und Daman und Diu • Delhi • Jammu und Kashmir • Ladakh • Lakshadweep • Puducherry | |
| Ehemooligi Bundesstaate |
Ajmer • Andhra • Bhopal • Bilaspur • Bombay • Coorg • Hyderabad • Jammu und Kashmir • Kachchh • Madhya Bharat • Mysore • Patiala and East Punjab States Union • Saurashtra • Travancore-Cochin • Vindhya Pradesh |