Menopause

(Witergleitet vun Klimakterium)

D Menopause isch der Ziitpunggt vo der letzte spontane Menstruation im Läbe von ere Frau, wo druf, retrospektiv betrachtet, kei ovariell usglösti Bluetig us der Gebärmueter meh chunnt und wo drmit d Fruchtbarkeit vo der Frau beändet isch. D Ursach isch en Änderig im Hormonhuushalt, wil die endokrini Funktion vo de Eierstöck noloot, e sogenannti Ovarialinsuffizienz. Der evolutionsbiologischi Hindergrund vo der Menopause isch nit bekannt, me verstoht s no weniger, wil s bi Dier kei vergliichbare Entwiggligsabschnitt git. En Erklärigsasatz, wo aber umstritten isch, isch d Grossmueter–Hypothese.[1]

D Übergangsphase vo der hormonelle Umstellig, wo in de Johr vorhär und bochhär stattfindet, wird as Klimakterium (Wächseljohr) bezeichnet. Die natürligi Menopause foot gwöhnlig zwüschen em 40. und 55. Altersjohr aa, durchschnittlig im Alter vo 50 bis 51 Johr. Bi magere Fraue, bi Underernährig und bi Fraue wo rauche cha sie guet 1,5 Johr früehner afo. E regelmässige Alkoholkonsum verzögeret s Ufdräte vo der Menopause dur en Erhöchig vom Östrogenspiegel. As vorziitigi oder prämaturi Menopause (Climacterium praecox) wird e Menopause dur mangelnds Funktioniere vo de Eierstöck vor em 40. Läbensjohr bezeichnet. As früehni Menopause zelt jedi Menopause zwüschen em 40. und 50. Läbensjohr. D Menopause cha künstlig usglöst wärde dur s Entfärne vo de Eierstöck, dur Bestrahlig oder dur Behandlig mit Antiestrogene. Denn wird von ere induzierte Menopause gredet.

D Menopause isch kei Chrankhet im eigetlige Sinn und im Regelfall muess si nit behandlet wärde. Bi usprägte klimakterische Beschwärde cha aber e Hormonersatztherapii nötig wärde. E Behandlig cha doderbii für Beschwärde, wo dur die hormonelli Umstellig im Klimakterium as Folg vom ene relative Hormonmangel entstöhn wie Osteoporose, vaginali Beschwärde, Hoorusfall, Hitziwallige etc., indiziert si.

Fuessnote ändere

  1. G. C. Williams. Pleiotropy, natural selection, and the evolution of senescence. Evolution 1957, 11, 398-411.
  Dä Artikel basiert uff ere fräie Übersetzig vum Artikel „Menopause“ vu de dütsche Wikipedia. E Liste vu de Autore un Versione isch do z finde.