Dr Konservatismus – au Konservativismus – (vo latiinisch conservare „erhalte, bewahre“ oder au „öbbis in siim Zsämmehang bhalte“) ghört näben em Liberalismus und em Sozialismus zu de drei grosse politische Ideologie, wo sich im 18. und 19. Johrhundert in Europa usebildet hai.

Dr Konservatismus isch entstande as Reaktion uf die Französischi Revolution mit dr Terrorherrschaft vom Robespierre und vo andere Revolutionäre. Gegen e Umsturz vo de bestehende Verheltnis und dr Diktatur, wo drmit verbunde gsi isch, het dr Konservatismus die „gueti und bewährti Ornig“ bedont (lueg Edmund Burke). Modernismus oder Progressivismus si d Gegepol vom Konservatismus.

Sit de 1980-er Johr wird differenziert zwüsche Strukturkonservatismus und Wärtkonservatismus. Strukturkonservatismus bezeichnet e Wältaschauig, won e politischi oder organisatorischi Ornig gege Kritik verteidige und ihri Verdeilig vo Macht und Ressource vor Veränderig wei schütze oder au e idealistischi Ordnigsidee, wo in dr Vergangeheit entwigglet worden isch, wei duresetze. Die Form vom Konservatismus cha au bi ehnder lingge Gruppierige ufdräte, wenn öbbe d SPD für dr Erhalt vom Steichohlebärgbau gsi isch und drmit e Strukturänderig im Ruhrgebiet uusezoge het. Im Underschiid drzue bedont dr Wärtkonservatismus bestimmti inhaltligi Positione wie zum Bispil d Bedütig vo dr traditionelle Familie. Zum die Wärt durezsetze, isch me wenn nötig au barat, Strukture z verändere, öbbe dur en Änderig vom Stüürrächt.

Us dr Sicht vo dr Gschicht vo Ideä verstoht me under Konservatismus ehnder d Position vom Wärtkonservatismus. Dr Konservatismus verlangt, ass me e Position, wo s scho git, wurd bhalte, sofärn s Neue nit as sehr vil besser gseh wird. Vili konservativi Dänker halte dr folgend Satz für dräffend: «Konservatismus ist nicht ein Hängen an dem, was gestern war, sondern ein Leben aus dem, was immer gilt.» (Dä Satz wird au em Antoine de Rivarol und au em Albrecht Erich Günther zuegschriibe.)

Eifach usdruggt luutet dr Grundsatz vom klassische Konservatismus: «Me sött Alts erst mit Neuem ersetze, wenn sich zeigt het, ass s Neue besser isch.»

Dä Artikel basiert uff ere fräie Übersetzig vu dere Version vum Artikel „Konservatismus“ vu de dütsche Wikipedia. E Liste vu de Autore un Versione isch do z finde.