Konstantin I.

Dr Konstantin I. (* z Syrie; † 9. April 715 z Rom) isch vu 708 bis zue sym Dood Paapscht gsii. Är isch am 25. Meerz 708 indroonisiert woore.

dr Konstantin I., Darstellig in dr Basilika Sankt Paul vor dr Muure

Lääbe un Wiirke

Är mueß scho unter em Paapscht Agatho e hochgschetzt Mitgliid vu dr Chilche gsii syy, wel er anne 680 Mitgliid vu dr pääpschtlige Delegation uf em Dritte Konzil vu Konstantinopel gsii isch.

Iber dr Konstantin, dr letscht byzantinisch „Vasallepaapscht“, waißt mer weenig. Uf Anornig vum deerige Chaiser Justinian II. het er anne 710 Byzanz bsuecht. Villicht um d Ergeebnis vu dr Trullanische Synod z bsteetige.

Händel het s gee mit em Erzbischof vu Ravenna, wel där sich em Paapscht nit het welle unterwäärfe, mit em Benedikt vu Mailand, em mailändische Erzbischof, wu vum Paapscht gfoorderet het, d Bischef vu Pavia sälber yyzsetze, un mit em Noofolger vum Justinian, em byzantinische Chaiser Philippikos Bardanes, wu vun em ohni Erfolg verlangt het, ass er dr Glaubesdefinition vum Dritte Konzil vu Konstantinopel abschweert.

Dr Paapscht het derfi solle soorge, ass d Bschliss vu dr Trullanische Synod vu 692 yyghalte wääre, wel em Chaiser zuedrait wooren isch, ass bsundersch d Pääpscht Sergius I. un Johannes VII. d Lehrsätz zue dr Disziplin abgläänt ghaa hän oder nume halbhäärzig uusgfiert hän. Bi dr Verhandlige het si dr Diakon Gregor (dr speeter Paapscht Gregor II.) fiiridue un e Kumpremiss aabote, wu boodi Syte zuestimme hän chenne. Dr Bsuech z Konstantinopel (710/711) isch fir 1250 Johr dr lescht Bsuech vun eme Paapscht bi dr Oschtchilche gsii, eerscht dr Paul VI. het si anne 1964 mit em Patriarch Athenagoras z Jerusalem drofe un het Istanbul anne 1967 bsuecht.

Di guete Beziehige zue Oschtrom sin aber nume chuurzi Zyt gange, wel dr Justinian II. vun ere Gruppe Soldaten am 4. Novämber 711 dood gschlaa wooren isch. Si hän dr Philippikos Bardanes, en iberzygte Aahänger vum Monotheletismus, uf dr Chaiserdroon gsetzt. Wu dr nei Chaiser em Exarch vu Ravenna ufdrait ghaa het, dr Monotheletismus z Rom yyzfiere, isch s zue reegelräächte Strooßeschlaachte chuu. Dr Paapscht Konstantin het doodruf e grooßi Zaal Prieschter in d Stadt ghoolt, wu si dr antichaiserlige Demonschtrante mit Chryz un Evangelien in Wääg gstellt un zum Friide gmahnt hän.

Lyychter fir boodi Syte isch s woore, wu 713 dr Philippikos gstiirzt wooren isch. Dr nei Chaiser, dr Anastasios II., het d Abmachige vum Chaiser Justinian II. bsteetigt un dodermit di verfyndete Laager uusgsehnt.

Dr Konstantin het in dr Zyt vu sym Pontifikat drei Kardinäl ernännt, dodrunter dr speeter Paapscht Gregor II., wu sy Noofolger wooren isch.

Di reemisch Zahl I. no sym Name isch optional, wel sy ainzige Noofolger mit em nämlige Name, dr Konstantin II., en Geegepaascht gsii isch.

Literatur

• David Miller: Costantino I, papa. In: Alberto M. Ghisalberti (Hrsg.): Dizionario Biografico degli Italiani (DBI). Band 30 (Cosattini–Crispolto), Istituto della Enciclopedia Italiana, Rom 1984 (italienisch).
• David Miller: Costantino. In: Enciclopedia dei Papi, Band I, Rom 2000.
• Ph. Levillain (Rusgeeber): Dictionnaire Historique de la Papauté. Paris 1994.
• R. Barth & F. Bedürftig: Taschenlexikon Päpste. 2000.

Weblink

 Commons: Konstantin I. – Sammlig vo Multimediadateie

• Constantinus, In: Salvador Miranda: The Cardinals of the Holy Roman Church, online uf fiu.edu, Websyte vu dr Florida International University, abgruefen am 23. Januar 2016. (änglisch)

Vorgänger	Amt	Nachfolger
Sisinnius	Papscht 708–715	Gregor II.

Dä Artikel basiert uff ere fräie Übersetzig vu dere Version vum Artikel „Konstantin_I._(Papst)“ vu de dütsche Wikipedia. E Liste vu de Autore un Versione isch do z finde.